Hoppa yfir valmynd

Íslenskur fjarskiptamarkaður í tölum - Tölfræðiskýrsla Fjarskiptastofu fyrir árið 2021 komin út

Fréttasafn
12. maí 2022

Íslenskur fjarskiptamarkaður í tölum - Tölfræðiskýrsla Fjarskiptastofu fyrir árið 2021 komin út

Mynd með frétt

Tvisvar á ári safnar Fjarskiptastofa upplýsingum frá skráðum fjarskiptafyrirtækjum hér á landi um ýmsar stærðir í rekstri og þjónustu á sviði fjarskipta. Upp úr þeim tölum vinnur stofnunin tölfræðiskýrslur sem sýna upplýsingar um helstu stærðir og fyrirtæki á íslenskum fjarskiptamarkaði. Markmiðið er að bæta upplýsingagjöf og auka gagnsæi á þessum markaði og eru skýrslur stofnunarinnar í samræmi við þær skýrslur sem systurstofnanir Fjarskiptastofu í nágrannalöndum okkar gefa út. 

Skýrslan sem nú er birt sýnir tölfræði um fjarskiptamarkaðinn fyrir árið 2021. Hún inniheldur tölulegar upplýsingar um helstu þætti á markaðnum og samanburð við stöðuna á árunum á undan. Skýrslunni er skipt upp eftir fastanetinu, farsímanetinu, föstum internettengingum og veltu og fjárfestingu á fjarskiptamarkaði. 

Hægt er að skoða gögnin frá hinum ýmsu sjónarhornum á Gagnatorgi Fjarskiptastofu.
Gagnatorginu er skipt í 4 yfirflokka; farsímanet, breiðband, IPTV og fastanet og þar undir eru 9 flokkar sem hægt er að skoða útfrá t.d. tímabilum og þjónustuveitendum.

Meðal helstu tölulegu upplýsinga um íslenska fjarskiptamarkaðarins árið 2021 má nefna: 

Þróun fyrri ára innan talsíma heldur áfram þar sem bæði notendum og mínútum fækkar milli ára og er fækkun viðskiptavina og mínútna aðallega hjá heimilum en ekki fyrirtækjum. Áskrifendum að heimasíma fækkar um 6,1% milli ára og mínútum fækkar um 17,2%. Síminn og Vodafone eru stærstu fyrirtækin á markaði fyrir heimasíma með rúm 88% hlutdeild í lok árs 2021.  

Heildarfjöldi farsímaáskrifta fjölgar lítillega milli ára eða um 4,5%. Fjölgun er í samningsbundnum áskriftum en fyrirfram greiddum áskriftum fækkar hins vegar. Fjöldi mínútna úr farsímum var 1.137 millj. mínútna á árinu 2021 en var árið á undan um 1.124 millj. mínútna og er fjölgun mínútna milli ára því aðeins um 1,0% sem líklega má rekja til minni fjarvinnu á árinu 2021 vegna COVID-19.

M2M kortum á farsímaneti fjölgaði verulega milli ára eða úr 112.188 í 1.179.191 kort í lok árs 2021 en þetta eru farsímakort þar sem tæki eru í sjálfvirkum samskiptum við önnur tæki sem á ensku kallast Machine-to-Machine eða M2M.

Gagnamagn á farsímaneti heldur áfram að aukast þótt dregist hafi úr aukningunni en hún var um 25% milli ára og eins og undanfarin ár er aukningin í tengslum við innleiðingu á 4G. Í farsímanetum er hlutfallslega meira gagnamagn notað í símum en í öðrum tækjum sem eru eingöngu fyrir gagnanotkun, t.d. spjaldtölvum eða 4G netbúnaði.  

Internettengingum fjölgar lítillega milli ára, en mikil aukning er í ljósleiðaratengingum samhliða fækkun í xDSL tengingum, í lok árs 2021 voru ljósleiðaratengingar rúm 75% allra internettenginga og er fjöldi ljósleiðaratenginga nú um 107 þús. tengingar. 

Heildargagnamagn á fastaneti jókst um rúm 20% milli ára og er um 88% gagnamagnsins vegna niðurhals en 12% vegna upphals. 

Áskrifendur með sjónvarp yfir IPTV voru 84.798 í lok árs 2021, en voru 88.109 árið á undan og hefur því fækkað um tæp 4% frá árinu á undan. 

Velta á fjarskiptamarkaði jókst á árinu 2021, tekjur af heimasíma og fastaneti fóru lækkandi en tekjur af farsímarekstri, gagnaflutningi og internetþjónustu, sjónvarpsþjónustu og annarri fjölmiðlun farið hækkandi. 

Fjárfesting á fjarskiptamarkaði er aðallega í fastaneti, m.a. vegna lagningar ljósleiðara og farsímarekstri. 

Helstu stærðir á fjarskiptamarkaði má sjá í töflunni hér fyrir neðan sem einnig er að finna í skýrslunni sjálfri. 

Tölfræðiskýrslan í heild

Ásamt skýrslunni er birt Excel skjal með bakgrunnsupplýsingum skýrslunnar í töflum og myndum. Smelltu hér til að sjá töflu um helstu stærðir á fjarskiptamarkaði. Töfluna er einnig er að finna í skýrslunni sjálfri.