Frétt

Fréttasafn
13. september 2021

Ný tölfræðiskýrsla fyrir árið 2020 um fjarskiptanotkun á Norðurlöndum og í Eystrasaltslöndunum

Þann 13. september 2021 kom út skýrsla sem Fjarskiptastofa (FST) og systurstofnanir hennar á Norðurlöndunum og í Eystrasaltslöndunum hafa tekið saman um notkun helstu þátta fjarskiptaþjónustu og þróun undanfarinna ára í löndunum átta. Þetta er tólfta árið í röð sem fjarskiptanotkun íbúa Norðurlandanna og Eystrasaltslandanna er borin saman. 
Á heildina litið er fjarskiptanotkun mjög lík í þessum löndum og íbúar þeirra nýta sér sambærilega tækni á svipaðan máta. Þrátt fyrir það má þó víða sjá mun á notkun og þróun einstakra þátta. 


Mikil aukning varð á fjölda mínútna í farnetum hjá öllum löndunum miðað við höfðatölu á árinu 2020 sem líklega má rekja til fjarvinnu vegna kórónuveirunnar þar sem margir íbúar landanna störfuðu að heiman. Gagnamagnsnotkun í farnetum heldur áfram að aukast hratt í öllum löndunum en þar bera Finnar höfuð og herðar yfir hinar þjóðirnar. 
Noregur eru efstir hvað varðar áskriftir þar sem tæki eru í sjálfvirkum samskiptum við önnur tæki en mikil aukning hefur átt sér stað hér á landi í áskriftum fyrir sjálfvirk samskipti á árinu 2020. Þetta eru svokallaðar tæki í tæki eða TíT áskriftir sem á ensku kallast Machine to Machine eða M2M. 


Notkun fastlínusíma heldur áfram að minnka í öllum löndunum bæði hvað varðar fjölda áskrifta og fjölda mínútna og þá aðallega hjá Íslendingum og Svíum. Íslendingar, Danir og Svíar skera sig úr þegar litið er til áskrifta að fastlínusíma með IP tækni. Aukningin hér á landi skýrist m.a. af fjölgun ljósleiðaratenginga hérlendis og fyrirhugaðri lokun á almenna talsímakerfinu PSTN sem áætlað er að leggja niður árið 2022. Þess ber að geta að hinir almennu notendur eiga ekki að verða varir við þá breytingu. 
Íslendingar eru nú í öðru sæti á eftir Svíum með flestar fastar háhraðainternettengingar miðað við höfðatölu fyrir auglýstan niðurhalshraða 30 Mbit/sek eða meira. Háhraðainternettengingum með 100 Mbit/sek og meira hefur fjölgað í flestum löndunum sem taka þátt í samanburðinum, en þar eru Íslendingar einnig í öðru sæti á eftir Svíum.


Þegar kemur að útbreiðslu háhraðaneta með 30 Mbit/sek eða meira eru 98% íslenskra heimila tengd slíkum netum. Hvað varðar útbreiðslu háhraðaneta er í skýrslunni gerður greinarmunur á „homes connected“ og „homes passed“, tölurnar fyrir Ísland miða við skilgreininguna „homes connected“ sem þýðir að inntak heimtaugar netsins er frágengið fyrir innan útvegg. „Homes passed“ sem önnur lönd nota þýðir hins vegar að tenging er til staðar úti í götu og mögulegt að fá hana lagða inn í hús með skömmum fyrirvara. Tölur landanna eru þó sambærilegar því í báðum tilvikum er útbreiðsluverkefni lokið og heimili getur pantað þjónustu þar sem netið verður fulltengt inn á heimilið þegar pöntun berst. 
Samkvæmt ofangreindum skilgreiningum er Ísland og Noregur á toppnum með útbreiðslu til 98% heimila, Danmörk í þriðja sæti með 97% og Svíþjóð með 95%. 


Danir eru í fyrsta sæti hvaða varðar fjárfestingar á árinu 2020 og Noregur í öðru sæti en mikið hefur dregið úr fjárfestingum hérlendis eftir miklar fjárfestingar árin á undan.
Sjá skýrsluna í heild (á ensku): Telecommunications Markets in the Nordic and Baltic Countries 2020.pdf

Tölfræðina má einnig skoða í gagnagrunni hennar sem geymdur er hjá systurstofnun Fjarskiptastofu í Svíþjóð, Post- og telestyrelsen. 
Á vef Fjarskiptastofu má einnig nálgast allar samanburðarskýrslurnar frá upphafi á einum stað.