FST barst kvörtun frá neytanda er varðaði þjónustuflutning til Nova án fullnægjandi samþykkis.

Nova var beðið um að sýna fram á að skriflegu eða rafrænu samþykki hafi verið aflað fyrir þjónustuflutningnum í samræmi við 11. gr. reglna nr. 1112/2022 um númera- og þjónustuflutning í almennum fjarskiptanetum. Fyrirtækið hafði hins vegar gengið út frá því að samþykki sem aflað væri í símtali myndi uppfylla þá kröfu.

Það var mat FST að Nova hefði brotið gegn 11. gr. reglna nr. 1112/2022 með því að hefja ferli við númera- og þjónustuflutning þegar hvorki skriflegt né rafrænt samþykki rétthafa hafi legið fyrir.

FST tók einnig til umfjöllunar aðgerðarleysi Nova við að koma upp bótakerfi vegna mistaka eða tafa við númera- og þjónustuflutning og taldi að tilefni væri til þess að beita stjórnsýsluviðurlögum, sbr. k-lið 103. gr. fjarskiptalaga.