Fréttasafn
21. september 2005
Fjögur norsk fjarskiptafyrirtæki útnefnd með umtalsverðan markaðsstyrk
Nánar
Norska Póst- og fjarskiptastofnunin hefur útnefnt fjögur fjarskiptafyrirtæki með umtalsverðan styrk á mörkuðum fyrir lúkningu símtala í farsímanetum (markaði 16). Þetta eru fyrirtækin Telenor ASA, NetComAS, Tele2Norge AS og Teletopia Mobile Communications AS. Á Telenor og NetCom er lögð á kvöð um verðþak á lúkningu símtala í eigin netum og er þeim gert að lækka verulega gjöld fyrir árslok 2006. Verðmunur á lúkningaþjónustu hjá þessum tveimur fyrirtækjum mun jafnframt minnka því farið er fram á að NetCom lækki gjaldskrá meira en Telenor. Forstjóri norsku Póst- og fjarskiptastofnunarinnar væntir þess að þessi ákvörðun komi neytendum til góða og að gjöld fyrir farsímanotkun muni lækka. Talið að sparnaður norskra neytenda geti numið meira en 400 milljónum norskra króna á ári að viðbættum virðisauka, eða um fjórum milljörðum íslenskra króna .
19. september 2005
Hagsmunaaðilar skila athugasemdum við greiningu PFS á tveimur mörkuðum
Nánar
Póst- og fjarskiptastofnun hefur borist athugasemdir hagsmunaaðila við drögum stofnunarinar að greiningu á markaði fyrir aðgang og upphaf símatala í almennu farsímaneti og á markaði fyrir lúkningu símtala í einstökum farsímanetum (markaðir 15 & 16). Drög að greiningu á þessum mörkuðum voru birt til samráðs 8. júlí s.l. Sjá samráðsgögn fyrir markað 15 Sjá samráðsgögn fyrir markað 16
18. september 2005
Tvö hundruð sjötíu og þrjú þúsund farsímar í notkun hér á landi
Nánar
Nær tvö hundruð sjötíu og þrjú þúsund GSM-farsímar eru í notkun hér á landi samkvæmt nýrri samantekt Póst- og fjarskiptastofnunar. Síminn er með 64,5 % allra farsímaáskrifenda og 66,4% þeirra sem eru með fyrirfram greidd símkort. 20.564 langdrægir NMT-farsímar eru í notkun og eru þeir allir í áskrift hjá Landsímanum. Sjá yfirlit um fjölda farsímanotenda
14. september 2005
Breiðbandið byltir sjónvarpsnotkun
Nánar
Breiðbandsvæðingin mun gerbylta sjónvarpsrekstri og því hvernig fólk notar sjónvarp. Þetta er meginniðurstaða nýrrar skýrslu breska ráðgjafafyrirtækisins Lovelace Consulting. Í henni segir að innan áratugs verði þorri alls sjónvarpsefnis sent yfir Netið og þá geti notendur vafrað á milli mörg þúsund efnisveitna og valið það efni sem þeir helst kjósa. Eins og fram kom í skýrslu OECD á vordögum er Ísland í fjórða sæti í útbreiðslu breiðbands með háhraðatengingum til um 50.000 heimila. Í Bretlandi er breiðbandsvæðingin enn styttra á veg komin. Engu að síður sjá menn það fyrir að flest heimili á Bretlandseyjum muni á næstu árum verða komin með breiðbandstengingu og geti þá tekið við stafrænum sjónvarpssendinum yfir netið eða IPTV (e.internet protocol TV). Hefðbundin sjónvarpsdagskrá mun því innan skamms heyra sögunni til ef marka má skýrsluna, en greint var frá niðurstöðum hennar í breska útvarpinu BBC á dögunum. Sjá frétt breska útvarpsins BBC Sjá grein um stafrænt sjónvarp
8. september 2005
Samgönguráðherra vill leggja niður úrskurðarnefnd póst- og fjarskiptamála
Nánar
Úrskurðarnefnd um póst- og fjarskiptamál verður lögð niður samkvæmt tillögu sem samgönguráðherra lagði fyrir ríkisstjórn þriðjudaginn 6. september. Í athugasemdum með frumvarpi um breytingar á fjarskiptalögum kemur fram að einfaldara þyki að samgönguráðuneytið úrskurði í málum þar sem ágreiningur um ákvarðanir Póst- og fjarskiptastofnunar á fjarskiptamarkaði kunna að koma upp. Meira um úrskurðarnefnd póst- og fjarskiptamála
6. september 2005
Íslendingar greiða lægstu gjöld fyrir heimilissíma samkvæmt nýrri OECD-skýrslu
Nánar
Í nýrri skýrslu Efnahags- og framfarastofnunarinnar (OECD) um fjarskipti kemur fram að Íslendingar greiða enn lægstu gjöldin fyrir heimilissíma ef miðað er við kaupgetu, eða um þriðjung af því sem símnotendur greiða almennt í dýrustu OECD-ríkjunum. Er þá miðað við meðalnotkun þegar hringt er innanlands, milli landa og í farsíma. Sjá nánar um samanburð á gjöldum fyrir símnotkun. OECD birtir einnig lista yfir verð fyrir ADSL-notkun í flestum aðildarríkjum, en þar sem aðferðarfræði er enn í mótun liggur ekki fyrir samanburður í töflum. Sjá nýja skýrslu OECD um fjarskipti Sjá gjaldskrá og kannanir
2. september 2005
Kennt í fjarskiptarétti í fyrsta sinn hér á landi
Nánar
Löfræðingar Póst- og fjarskiptastofnunar munu á haustönn 2005 kenna meistaranemum í lögfræði við Háskólann í Reykjavík meginreglur í fjarskiptarétti. Er þetta í fyrsta sinn að fjarskiptaréttur er kenndur við íslenskan háskóla. Á námskeiðinu verður fjallað um tengsl fjarskiptaréttar og samkeppnisréttar og skoðað hvernig evrópskt laga- og regluverk hefur verið innleitt í íslensk lög. Í námskeiðslýsingu segir m.a.: Fjárskiptamarkaður er í örri þróun og það sama má segja um þær réttarreglur sem um hann gilda. Markaðurinn hefur þá sérstöðu, að á honum ríkti einkaréttur allt fram til ársins 1998. Þegar samkeppni var gefin frjáls höfðu fyrrum einkaréttarhafar yfirburðastöðu á markaði, bæði vegna mikillar markaðshlutdeildar og ómissandi aðstöðu eins og fjarskiptanet, sem nýjum fyrirtækjum var ómögulegt að koma sér upp. Til þess að gefa nýjum fyrirtækjum möguleika á að koma inn á markað þurfti að mæla fyrir um aðgang að fjarskiptanetum fyrrum einkaréttarhafa. Evrópusambandið innleiddi af þeim sökum löggjöf, sem ætlað var að stuðla að samkeppni í fjarskiptum á innri markaði ESB og er mikil áhersla lögð á samræmda innleiðingu og framkvæmd hennar í aðildarríkjum. Námskeiðið í fjarskiptarétti er þrjár einingar og verður m.a. farið yfir verklag við greiningu á fjarskiptamarkaði og þau úrræði sem kveðið er á um í lögum til að efla samkeppni og tryggja jafnræði. Kennarar eru Sigurjón Ingvason forstöðumaður lagadeildar PFS, Friðrik Pétursson forstöðumaður þjónustudeildar og Jóhanna H. Halldórsdóttir. Háskólinn í Reykjavík býður í haust í fyrsta sinn upp á meistaranám í lögum. Nemendur geta valið um áherslur og námsleiðir og sérhæft sig á ýmsum sviðum.
24. ágúst 2005
Gjöld fyrir alþjónustu innan eðlilegra marka - ný verðkönnun
Nánar
Samkvæmt 20. gr. fjarskiptalaga nr. 81/2003 er Póst- og fjarskiptastofnun (PFS) skylt að hafa eftirlit með gjaldskrám fyrir alþjónustu. Stofnunin á að sjá til þess að alþjónusta sé veitt á eðlilegu og viðráðanlegu verði og fylgjast með því að verðþróun sé í samræmi við kaupmátt innan lands. Auk þess má hafa hliðsjón af verðlagningu í viðmiðunarríkjum. Til alþjónustu í fjarskiptum heyrir m.a. talsímaþjónusta, rekstur almenningssíma og upplýsingaþjónusta um símanúmer 118 og hvílir sú kvöð á Símanum sem fyrirtækis með umtalsverða markaðshlutdeild að veita þessa þjónustu. Til að framfylgja eftirlitsskyldunni gerði PFS í sumarbyrjun verðsamanburð á gjaldskrám fyrir talsímaþjónustu, símtölum úr almenningssímum og símtölum í 118 hér á landi og í viðmiðunarríkjum. Í ljós kom að verð fyrir þessa þjónustu hér á landi er innan eðlilegra marka. Gjaldskrá fyrir almenningssíma er töluvert lægri hér á landi en í Noregi og Svíþjóð og gildir þá einu hvort hringt er úr almenningssíma í fastanetssíma eða farsíma. Þá kemur fram að einnar mínútu símtal í upplýsingaþjónustuna 118 er ódýrari hér á landi en í Noregi, Svíþjóð og Danmörku, en meira en helmingi dýrari en á Írlandi og Grikklandi. Í ljósi þessarar niðurstöðu sér PFS ekki ástæðu til að ákveða hámarksverð fyrir talsímaþjónustu, símtöl úr almenningssímum eða símtöl í 118, eins og heimild er til í 2. mgr. 20. gr. fjarskiptalaga. Sjá verðsamanburð (pdf-snið 25,0 KB) Sjá verðsamanburð breska greiningarfyrirtækisins Teligen á símkostnaði á Norðurlöndum og í OECD-löndum. Maí 2005 (pdf-snið 116 KB). Sjá verðskrá Símans fyrir almenningssíma