Fréttasafn
31. janúar 2011
Alþjóðlegi netöryggisdagurinn 2011
Nánar
Mennta- og menningarmálaráðuneytið, innanríkisráðuneytið og SAFT standa fyrir ráðstefnu um Internetið á alþjóðlega netöryggisdeginum, þann 8. febrúar 2011 á Hilton hóteli, Nordica. Ekkert þátttökugjald Rafræn skráning á http://www.saft.is/skraning Dagskrá 8.30 - 8.45 Skráning 8.45 – 9.00 Ásta Magnúsdóttir, ráðuneytisstjóri í mennta- og menningarmálaráðuneytinu býður gesti velkomna og setur ráðstefnuna 9.00 - 9.15 Katrín Jakobsdóttir, mennta- og menningarmálaráðherra flytur ávarp og veitir verðlaun í Evrópusamkeppni um besta barnaefni á netinu 9.15 – 9.30 Ögmundur Jónasson, innanríkisráðherra flytur ávarp og kynnir samskiptaáætlun 9.30 - 10.10 Lee Hibbard, verkefnisstjóri upplýsingasamfélags og Internet Governance mála hjá Evrópuráðinu fjallar um stefnumótun og jákvæða og neikvæða þróun löggjafar sem tekur til ólíkra þátta sem tengjast Internetinu 10.10 - 10.30 Íris Kristín Andrésdóttir frá Icelandic Gaming Industry heldur erindi um nýjar og skapandi atvinnugreinar tengdar Internetinu og sýnir dæmi 10.30 - 11.00 Kaffihlé 11.00 - 11.40 Dr. William Drake frá Centre for International Governance, Graduate Institute of International and Development Studies í Sviss fjallar um þróun og stefnumótun á Internetinu, um hlutverk ICANN og um nauðsyn á alþjóðlegu samstarfi 11.40 - 12.00 Anna Kristína Lobers og Fanndís Logadóttir frá ungmennaráði SAFT fjalla um sýn ungra notenda á framtíð Internetsins 12.00 - 13.00 Hádegisverður á kostnað ráðstefnugesta 13.00 - 14.20 Málstofur 1. Hvernig tryggjum við öryggi ungs fólks á netinu og hvetjum til ábyrgrar notkunar nýmiðla? Lykilspurning þessarar málstofu er hvort lausnin felist í öflugri löggjöf sem auðveldar okkur að banna eða sía burtu efni eða hvort hún felist í markvissri fræðslu um netnotkun, kosti þess og galla? Hvert er hlutverk foreldra, skóla og samfélagsins í þessu samhengi? Til umfjöllunar verða rannsóknir á netnotkun, fræðsluefni, fjölmiðlalæsi og gagnrýnin netnotkun, tæling, rafrænt einelti, rafræn skilríki, farsímanotkun, samfélagssíður, netleikir o.fl. Málstofustjóri er Halldór Jörgensson, framkvæmdastjóri Microsoft á Íslandi. Í pallborði sitja Ólafur Elínarson frá Capacent, Hrefna Sigurjónsdóttir frá Heimili og skóla, Jenný Ingudóttir, frá Lýðheilsustöð, og Margrét Júlía Rafnsdóttir frá Barnaheill - Save the Children Iceland, með þátttöku fleiri aðila. Umsjónarmaður og ritari málstofu er Guðberg K. Jónsson, framkvæmdastjóri SAFT. 2. Hvaða réttindi gilda á netinu? Hvaða rétt höfum við til tjáningar og til upplýsingaöflunar? Er Ísland eyland, eða þurfum við að taka tillit til löggjafar annarra ríkja? Sumarið 2010 var samþykkt þingsályktun um að Ísland skapi sér afgerandi lagalega sérstöðu varðandi vernd tjáningarfrelsis. En hvaða reglur gilda um Internetið þegar tjáningarfrelsið er annars vegar? Hver er ábyrgur fyrir því efni sem birt er? Hvernig getur eitthvað sem skrifað er á netsíðu á Íslandi farið fyrir erlenda dómstóla? Er hætta á málsókn í meiðyrðamálum fyrir erlendum dómstólum vegna ummæla á Internetinu? Hvaða leiðir eru færar fyrir Íslendinga þegar ólöglegt efni og meiðyrði er vistað hjá erlendum aðilum? Í málstofunni verður fjallað um landamæraleysi Internetsins út frá ólíkum sjónarhornum tjáningarfrelsis og frelsis til upplýsinga. Málstofustjóri og umsjónarmaður málstofu er Elfa Ýr Gylfadóttir, deildarstjóri fjölmiðladeildar í mennta- og menningarmálaráðuneyti. Í pallborði sitja Eiríkur Jónsson, dósent við lagadeild HÍ, Smári McCarthy tölvusérfræðingur og einn aðalhöfundur þingsályktunar um tjáningarfrelsi, Þórir Ingvarsson frá Lögreglustjóranum á höfuðborgarsvæðinu og Eyvindur G. Gunnarsson, dósent við lagadeild HÍ. Ritari málstofunnar er Agnes Guðjónsdóttir, lögfræðingur í mennta- og menningarmálaráðuneyti. 3. Hvernig á að tryggja fjarskiptainnviði á Íslandi. Er öryggi nægjanlegt? Er þörf á frekari vörnum? Kröfur um trausta innviði fjarskipta og öryggi fjarskiptakerfa verða stöðugt meiri, í takt við síaukna og fjölbreyttari notkun Internetsins sem vinnutækis, þjónustuleiðar og afþreyingar í daglegu lífi. Á sama tíma steðja að Internetinu fjölbreyttar og síbreytilegar öryggisógnir. Sterkar kröfur eru því uppi um að efla öryggi notenda, gagna og búnaðar á Netinu. Rætt er um hvaða ábyrgð stjórnvöld, markaðsaðilar og almennir notendur hafa á þessu sviði. Í málstofunni verður rætt um hlutverk og ábyrgð stjórnvalda og markaðsaðila til að efla öryggi Netsins. Málstofustjóri og umsjónarmaður málstofu er Hrafnkell V. Gíslason, forstjóri Póst- og fjarskiptastofnunar. Í pallborði sitja Bragi Leifur Hauksson, verkefnastjóri rafrænnar stjórnsýslu hjá Tryggingarstofnun ríkisins, Benedikt Gröndal, tæknistjóri THOR Data Center, Laufey Erla Jóhannesdóttir, öryggisstjóri heildsölu hjá Símanum og Stefán Snorri Stefánsson, sérfræðingur í net- og upplýsingaöryggi hjá Póst- og fjarskiptastofnun. Ritari málstofu er Anna Margrét Sigurðardóttir, kynningarfulltrúi Póst- og fjarskiptastofnunnar. 14-20 - 14.40 Kaffihlé 14.40 - 16.00 Málstofur 4. „Trúum því að fólk vilji eiga heiðarleg viðskipti…“ Um verslun, framboð og aðgang að afþreyingu, upplýsingum og menningarefni á netinu. Í þessari málstofu verður til umræðu hvernig hægt er að auka og auðvelda löglegt aðgengi að afþreyingu, upplýsingum og menningarefni á netinu. Með menningarefni er átt við tónlist, kvikmyndir, bókmenntir, ljósmyndir og gömul gögn, sem hafa verið færð á stafrænt form. Aukið framboð á efni og auðveldir viðskiptahættir eru meðal þess sem helst er nefnt til að vinna gegn ólögmætri dreifingu höfundavarins efnis á netinu. En hvernig á að gera það? Hverjar eru helstu hindranir í veginum fyrir því? Eiga yfirvöld að beita sér af meiri hörku gegn ólögmætri dreifingu efnis? Fara hagsmunir dreifingarfyrirtækja, söluaðila og höfunda saman eða eru hagsmunaárekstrar milli þeirra? Málstofustjóri og umsjónarmaður málstofu er Þorgeir Ólafsson sérfræðingur í mennta- og menningarmálaráðuneyti. Í pallborði sitja Eyjólfur Guðmundsson, stjórnarmaður í Icelandic Gaming Industry, Flóki Ásgeirsson, stjórnarmaður í Félagi um stafrænt frelsi á Íslandi, Snæbjörn Steingrímsson, framkvæmdastjóri SMÁÍS, Örn Hrafnkelsson frá Landsbókasafni / Háskólabókasafni og Gylfi Blöndal hjá Gogoyoko. Ritari málstofunnar er Eiríkur Þorláksson, sérfræðingur í mennta- og menningarmálaráðuneyti. *Titill málstofu er fenginn frá Gylfa Blöndal í viðtali við Morgunblaðið 5. Uppbygging nýrra atvinnugreina á Internetinu. Hver eru tækifærin og ógnirnar fyrir íslensk fyrirtæki? Af stefnuyfirlýsingum íslenskra stjórnvalda má ráða hug í uppbyggingu atvinnugreina í upplýsingatækniiðnaði. Ísland er að mörgu leyti heppilegur kostur fyrir starfsemi í þessum geira. Landið er staðsett milli Evrópu og Norður-Ameríku, kalda loftslagið hentar mjög vel fyrir tölvubúnað sem þarfnast kælingar, raforka Íslands er bæði ódýr og umhverfisvæn og Íslendingar eru meðal nettengdustu þjóða í heimi. Engu að síður berast ábendingar um að Ísland megi gera betur í stafrænni framleiðslu og þjónustu, að netþjónar á vegum íslenskra upplýsingatæknifyrirtækja séu hýstir í öðrum löndum og að rekstrargrundvöllur nýrra upplýsingatæknifyrirtækja sé ekki eins og best verður að kosið. Leitast verður við að draga fram álitaefni um hlutverk og stöðu Íslands í uppbyggingu hins græna upplýsingatækniiðnaðar, hvar tækifærin liggja og hvaða þáttum þurfi að huga betur að svo Ísland nái þeim markmiðum sem greina má í stefnu íslenskra stjórnvalda. Málstofustjóri er María Rún Bjarnadóttir, lögfræðingur í innanríkisráðuneyti. Í pallborði sitja Alexander Picchietti, framkvæmdastjóri Basis, Guðmundur Gunnarsson, framkvæmdastjóri Farice, Ingvar Bjarnason frá CCP, Hjálmar Gíslason, framkvæmdastjóri DataMarket og netfrumkvöðull og Huginn Freyr Þorsteinsson, aðstoðarmaður fjármálaráðherra. Umsjón og ritari málstofu er Tryggvi Björgvinsson, tölvuverkfræðingur í mennta- og menningarmálaráðuneyti. 6. Nýting Internetsins í námi og kennslu. Um aðgengi að opnu menntaefni á netinu. Möguleikar og hindranir. Áreiðanleiki, gæði, kostir og gallar. Fjallað verður um opið menntaefni á netinu og hvaða hindranir standa í vegi fyrir að fólk sé tilbúið til að nýta og miðla efni á Internetinu. Opið menntaefni getur verið námskeið, kennsluefni, námsefni, verkefni, próf, rannsóknarskýrslur, fræðigreinar, greinar, bækur, kvikaðar myndir, ljósmyndir, hugbúnaður, netsamfélög og önnur verkfæri, efni eða tækni sem er notuð til að styðja við aukna þekkingu. Hvaða máli skiptir að kennarar og nemendur hafa aukinn aðgang að slíku efni og hvetjandi tækniumhverfi? Hvert er hlutverk stjórnvalda í þessu efni? Geta stjórnvöld (eða aðrir aðilar) opnað dyr sem eru lokaðar núna? Fara hagsmunir aðila sem búa til séreignarefni og opið efni saman eða eru hagsmunaárekstrar á milli þeirra? Málstofustjóri er Sigurjón Mýrdal, deildarstjóri í mennta- og menningarmálaráðuneyti. Í pallborði sitja Salvör Gissurardóttir, lektor í upplýsingatækni við menntavísindasvið HÍ, Þuríður Jóhannsdóttir, einnig lektor við menntavísindasvið HÍ, Sigurður Fjalar Jónsson, kennari við Fjölbrautarskólann í Breiðholti og starfsmaður Hugur/Ax og Sigurbjörg Jóhannesdóttir, sérfræðingur í mennta- og menningarmálaráðuneyti. Umsjón með málstofu hafa Sigurjón Mýrdal og Sigurbjörg Jóhannesdóttir. Ásta María Reynisdóttir, sérfræðingur í mennta- og menningarmálaráðuneyti er ritari málstofunnar. 16:00 - 16:30 Stutt samantekt
27. janúar 2011
PFS kallar eftir samráði vegna breytinga á viðmiðunartilboði Mílu fyrir opinn aðgang að heimtaugum
Nánar
Póst- og fjarskiptastofnun kallar eftir samráði um fyrirhugaðar breytingar á viðmiðunartilboði Mílu um opinn aðgang að heimtaugum (RUO). Síðast samþykkti stofnunin viðmiðunartilboð Mílu á þessu sviði með ákvörðun PFS nr. 1/2009, í kjölfar markaðsgreiningar á markaði 11, sbr. ákvörðun PFS nr. 26/2007.Með bréfi PFS, dags. 18. ágúst 2010 óskaði stofnunin eftir því að Míla uppfærði viðmiðunartilboð fyrirtækisins m.a. vegna tíðniskipulags á heimtaugum.Míla skilaði inn tillögum að breytingum með tölvupósti, dags. 1. október 2010. Í samráði við Mílu var ákveðið að bíða með að setja breytingarnar í samráð fram yfir áramót 2010/2011. Fyrir áramótin fóru fram umfangsmiklar mælingar af hálfu Mílu, í samstarfi við Símann og Vodafone, sem höfðu það m.a. að markmiði að greina hugsanlegar truflanir og finna orsakavald þeirra í heimtauganeti Mílu. Helstu niðurstöður þeirrar vinnu má sjá hér (PDF skjal). Frestur til að senda inn umsagnir og athugasemdir vegna viðmiðunartilboðsins er til 2. mars n.k. Óskað er eftir að umsagnir, athugasemdir eða ábendingar verði sendar á rafrænu formi á netfangið fridrik(hjá)pfs.is. Jafnframt er óskað eftir að stofnunin fái send frumrit til skráningar.Breytingar eru gerðar á viðmiðunartilboðinu sjálfu og eftirfarandi viðaukum, aðrir viðaukar eru óbreyttir. Sjá samráðsskjölin hér fyrir neðan: Viðmiðunartilboð Mílu fyrir opinn aðgang að heimtaugum, dags. 1. október 2010 (PDF) Viðauki 1a (Grunnþjónusta) (PDF) Viðauki 2e (Tæknikröfur um búnað við fullan aðgang) (PDF) Skýringar Mílu með þeim breytingum sem gerðar eru (PDF)
24. janúar 2011
PFS kallar eftir samráði við hagsmunaaðila um notkun 2.6 GHz tíðnisviðsins á Íslandi
Nánar
Póst - og fjarskiptastofnun (PFS) hefur ákveðið að efna til samráðs við hagsmunaaðila vegna fyrirhugaðrar framlengingar á MMDS leyfi Og fjarskipta ehf. (Vodafone). Vodafone hefur óskað eftir framlengingu tíðniheimildarinnar til níu ára, þ.e. til ársins 2020.Með hliðsjón af ákvörðun framkvæmdastjórnar ESB um notkun tíðnisviðsins 2,6 GHz (2500 – 2690 MHz), núverandi notkunar þess á Íslandi og í ljósi þess að stofnuninni ber að nota gagnsæjar aðferðir við úthlutun tíðnileyfa óskar PFS hér með eftir athugasemdum frá hagsmunaaðilum á þessum markaði vegna þessa. Frestur til að skila inn umsögnum og athugasemdum er til kl 12:00, föstudaginn 4. febrúar 2011. Umsagnir berist með tölvupósti á netfangið thorleifur(hjá)pfs.is. Sjá nánar í samráðsskjali:Notkun 2.6 GHz (2500 – 2690 MHz) tíðnisviðsins á Íslandi - Fyrirhuguð framlenging á MMDS leyfi Og fjarskipta ehf (Vodafone) (PDF)
13. janúar 2011
PFS birtir ákvörðun um kostnaðargreiningu fyrir aðstöðuleigu
Nánar
Póst- og fjarskiptastofnun hefur birt ákvörðun sína nr. 41/2010 varðandi kostnaðargreiningu Mílu ehf. á verðskrá fyrir aðstöðuleigu (hýsingu). Niðurstaða PFS var sú að verðskrá fyrir leigu á aðstöðu í húsum skuli hækka miðað við vegið meðaltal um 2,8% og verðskrá mastra um 12%.Núverandi afsláttarfyrirkomulag hýsingar Mílu verður lagt niður og þess í stað þess koma afsláttarflokkar sem byggja á samningslengd en ekki magni. Nýir afslættir verða 5%, 10% eða 15% miðað við að lengd samnings sé 2, 3 eða 5 ár hvert um sig.Sjá ákvörðunina í heild: (pdf)
30. desember 2010
PFS birtir ákvörðun varðandi arðsemiskröfu GR og lögmæti hlutafjáraukningar sem fram fór í félaginu í desember 2008
Nánar
Póst- og fjarskiptastofnun hefur birt ákvörðun sína nr. 39/2010 varðandi arðsemiskröfu Gagnaveitu Reykjavíkur ehf. (GR) og lögmæti hlutafjáraukningar sem fram fór í félaginu í desember 2008. Niðurstaða PFS var sú að umrædd hlutafjáraukning sem fram fór í GR þann 16. desember 2008 og móðurfélag þess, Orkuveita Reykjavíkur sf., var greiðandi að hafi ekki brotið í bága við 36. gr. fjarskiptalaga nr. 81/2003 um fjárhagslegan aðskilnað fjarskiptastarfsemi frá einkaréttarstarfsemi samstæðunnar. Ennfremur að GR uppfyllti kröfu PFS um eðlilega arðsemiskröfu á eigið fé félagsins sem gera verði til fjarskiptafyrirtækis á samkeppnismarkaði. Til að tryggja að svo yrði áfram er félaginu gert að senda PFS árlega ítarlegar upplýsingar um rekstur og efnahag, ásamt endurskoðaðri viðskiptaáætlun og arðsemiskröfu félagsins í samræmi við nánari fyrirmæli stofnunarinnar þess efnis. Sjá ákvörðunina í heild:Ákvörðun PFS nr. 39/2010 varðandi arðsemiskröfu GR og hlutafjáraukningu í félaginu í desember 2008
7. desember 2010
PFS framlengir rekstrarleyfi Íslandspósts til ársloka 2012
Nánar
Póst- og fjarskiptastofnun hefur með bréfi til Íslandspósts framlengt gildistíma rekstrarleyfis fyrirtækisins til 31. desember 2012. Ástæða þess er sú að íslensk stjórnvöld hafa sótt um undanþágu á innleiðingu tilskipunar nr. 2008/6/EC til EFTA, en tilskipunin kveður m.a. á um afnám einkaréttar í póstþjónustu. Ætlun stjórnvalda er að innleiðing tilskipunarinnar í íslenska löggjöf á sviði póstþjónustu verði lokið fyrir lok ársins 2012.
2. desember 2010
PFS auglýsir lausa til umsóknar stöðu hópstjóra öryggis- og viðbragðsteymis vegna netöryggismála
Nánar
Í framhaldi af samþykkt Ríkisstjórnar Íslands í nóvember 2010 um stofnun öryggis- og viðbragðsteymis vegna netöryggismála, auglýsir Póst- og fjarskiptastofnun eftir hópstjóra til að móta verklag fyrir viðbragðsteymið ásamt innleiðingu þess hjá stofnuninni. Hlutverk viðbragðsteymisins er að greina, miðla upplýsingum og koma á samstarfi við hagsmunaaðila hér á landi og erlendis. Starfssvið• Mótun verklags og innleiðing vinnuferla• Greining á spilliforritum og viðbrögð við öryggisatvikum • Þátttaka í alþjóðlegu samstarfi um öryggi Internetsins• Ráðgjöf og upplýsingagjöf varðandi öryggismál• Koma á samvinnu við netöryggishópa hagsmunaaðila innanlands og stuðla að stofnun slíkra þar sem þörf er á• Leiða atvika-, veikleika- og búnaðargreiningu ásamt því að dreifa upplýsingum um atvik og berskjölduð tölvu- og fjarskiptakerfi• Aðstoð við uppbyggingu þekkingar í meðhöndlun öryggisatvika hjá innlendum netöryggishópum Menntun og reynslaHáskólapróf í verk-, tækni- eða tölvunarfræði eða öðrum raungreinum. Sérmenntun eða starfsreynsla á sviði hugbúnaðargerðar ásamt þekkingu á fjarskiptamarkaðnum er nauðsynleg. Aðrar hæfniskröfurUmsækjendur þurfa að eiga auðvelt með að starfa sjálfstætt sem og í hópi og jafnframt búa yfir þeim sveigjanleika og festu sem nauðsynleg er til að ná árangri í starfi. Gerð er krafa um mikla greiningarhæfni, öguð og skipulögð vinnubrögð, ríkulega samskiptafærni ásamt getu til ákvarðanatöku við flóknar og krefjandi aðstæður. Umsækjendur þurfa að búa yfir skilningi á internettækni ásamt færni til að meta upplýsingar um áhættu og áhrif ásamt getu til að miðla tæknilegum upplýsingum til annarra. Góð íslensku og enskukunnátta, bæði töluð og rituð, er áskilin. Um er að ræða krefjandi starf í síbreytilegu og spennandi umhverfi þar sem gerðar eru miklar fagkröfur. Umsóknarfrestur er til og með 19. desember n.k. Umsækjendur eru beðnir um að sækja um starfið hér á heimasíðu PFS (sjá neðar). Umsókn skal fylgja ferilskrá ásamt viðeigandi prófgögnum í viðhengi. Öllum umsóknum verður svarað þegar ákvörðun um ráðningu hefur verið tekin. Póst- og fjarskiptastofnun lítur svo á að umsókn gildi í 6 mánuði frá dagsetningu hennar, nema umsækjandi ákveði umsókninni skemmri gildistíma.Nánari upplýsingar um starfið veitir Þorleifur Jónasson, forstöðumaður tæknideildar, í síma 510 1505, thorleifur@pfs.is Sækja um
26. nóvember 2010
Síminn braut gegn trúnaðarskyldum með því að hagnýta sér upplýsingar um viðskiptavini Nova og Vodafone
Nánar
Póst- og fjarskiptastofnun hefur birt ákvörðun sína nr. 37/2010 varðandi brot Símans hf. á trúnaðarskyldum sínum samkvæmt 26. gr. fjarskiptalaga. Málið varðaði kvörtun Nova vegna meintra brota Símans á trúnaðarskyldum sínum samkvæmt samtengisamningi félaganna með því að nota upplýsingar um fjarskiptaumferð í markaðslegum tilgangi. Við rannsókn PFS á málinu, sem m.a. byggðist á gögnum sem Samkeppniseftirlitið hafði lagt hald á í húsleit hjá Símanum, kom í ljós að Síminn hafði unnið umfangsmikla úthringilista um viðskiptavini annarra fjarskiptafyrirtækja sem höfðu að geyma sundurgreinanlegar upplýsingar um mörg þúsund viðskiptavini þeirra. Nánar tiltekið var um að ræða upplýsingar um símanúmer, nöfn, kennitölur, heimilisföng og í sumum tilfellum starfsheiti viðkomandi viðskiptavina, ásamt upplýsingum um fjölda símtala hvers og eins, lengd í sekúndum og lengd meðalsímtals. Á seinni stigum málsins gerðist Vodafone aðili að málinu þar sem hegðun Símans beindist einnig gegn viðskiptavinum þess félags, sbr. ákvörðun PFS nr. 26/2010. Síminn viðurkenndi að smásalan hafi ekki haft heimild til að nýta umræddar upplýsingar í markaðslegum tilgangi en hafnaði því að smásalan gæti ekki átt rétt á slíkum upplýsingum í ýmsum öðrum tilgangi. Með viðurkenningu sinni hefur félagið þannig sýnt viðleitni til að upplýsa málið og ná sáttum. Í 26. gr. fjarskiptalaga er að finna ákvæði sem lýtur að innbyrðis samskiptum fjarskiptafyrirtækja og meðferð þeirra á trúnaðarupplýsingum sem þau öðlast við gerð eða framkvæmd samninga um aðgang eða samtengingu. Þar kemur m.a. fram að fyrirtækin skuli eingöngu nota upplýsingarnar í þeim tilgangi sem þær voru veittar og halda trúnað á öllum stigum. Einnig að óheimilt sé að afhenda upplýsingarnar öðrum, þ.á.m. öðrum deildum fyrirtækisins eða tengdum aðilum. Niðurstaða PFS var sú að Síminn hefði brotið gegn framangreindri lagagrein með því að nota umræddar umferðarupplýsingar í öðrum tilgangi en þær voru fengnar, þ.e. með afhendingu þeirra frá heildsölu til smásölu félagsins með það fyrir augum að nota þær í markaðslegum tilgangi. Með sömu háttsemi braut Síminn gegn ákvörðunum PFS frá árunum 2006 og 2008, viðmiðunartilboði félagsins um samtengingu talsímaneta og afleiddum samtengisamningum við önnur fjarskiptafyrirtæki. Póst- og fjarskiptastofnun lítur ofangreinda háttsemi mjög alvarlegum augum. Það er gríðarlega mikilvægt fyrir örugga, skilvirka og hagkvæma tilhögun fjarskiptamarkaðarins að ákvæði 26. gr. fjarskiptalaga sé virt af fjarskiptafyrirtækjum í hvívetna. Frávik frá því geta haft alvarlegar afleiðingar í för með sér fyrir samkeppni og framþróun á fjarskiptamarkaði og skapað skaðlegt vantraust á milli fjarskiptafyrirtækja. PFS mun framkvæma, eða láta framkvæma fyrir sig, úttekt á samskiptum heildsölu og smásölu Símans í kjölfar ofangreindrar ákvörðunar. Þá varðaði málið ágreining um það hvort ofangreind háttsemi Símans bryti í bága við ákvæði 42. gr. fjarskiptalaga að því er varðar vernd persónuupplýsinga og friðhelgi einkalífs viðskiptavina annarra fjarskiptafélaga en Símans. PFS framsendir Persónuvernd þann hluta málsins þar sem vinnsla Símans á slíkum persónuupplýsingum getur fallið undir almenn ákvæði um vinnslu persónuupplýsinga í skilningi laga nr. 77/2000 um persónuvernd og meðferð persónuupplýsinga. Engu að síður taldi PFS rétt að mæla fyrir um að Síminn setti sér verklagsreglur um meðferð persónuupplýsinga og eyðingu gagna í samræmi við 7. mgr. 42. gr. fjarskiptalaga og skilyrði sem Persónuvernd kann að setja. Reglurnar skulu bornar undir PFS til samþykktar eigi síðar en 1. mars 2011. Sjá ákvörðunina í heild:Ákvörðun PFS nr. 37/2010 varðandi brot Símans á trúnaðarskyldum samkvæmt 26. gr. fjarskiptalaga