Fréttasafn
6. febrúar 2007
Skyldur um aðgang að farsímaneti og þjónustu á heildsölustigi lagðar á Símann
Nánar
Ákvörðun Póst- og fjarskiptastofnunar um útnefningu Símans með umtalsverðan markaðsstyrk og álagningu kvaða á markaði fyrir aðgang og upphaf símtala í almennum farsímanetum Póst- og fjarskiptastofnun (PFS) hefur nú lokið greiningu á heildsölumarkaði fyrir aðgang og upphaf símtala annars vegar í GSM farsímanet og hins vegar í NMT farsímanet. Á grundvelli niðurstaðna úr markaðsgreiningunni hefur PFS ákveðið að útnefna Símann með umtalsverðan markaðsstyrk á báðum mörkuðum. Það er jafnframt niðurstaða PFS að Vodafone sé ekki lengur með umtalsverðan markaðsstyrk á farsímamarkaði skv. eldri fjarskiptalögum nr. 107/1999. PFS hefur ákveðið að leggja á Símann skyldu til að verða við eðlilegum og sanngjörnum beiðnum um aðgang að GSM farsímaneti og þjónustu á heildsölustigi, m.a.um: innanlands reiki samnýtingu eða samhýsingu aðgang til endursölu sýndarnetsaðgang. Jafnframt eru lagðar á GSM farsímanet Símans kvaðir um jafnræði, gagnsæi, bókhaldslegan aðskilnað og eftirlit með gjaldskrá. Símanum er gert skylt að birta viðmiðunartilboð fyrir aðgang að GSM farsímaneti sínu og þjónustu þar sem fram koma aðgangsverð fyrir endursölu, sýndarnet og innanlands reiki. PFS hefur ákveðið að leggja á Símann skyldu til að verða við eðlilegum og sanngjörnum beiðnum um aðgang til endursölu að NMT farsímaneti og þjónustu. Jafnframt eru lagðar á NMT farsímanet Símans kvaðir um jafnræði, gagnsæi og eftirlit með gjaldskrá. Markmið fjarskiptalöggjafarinnar og Póst- og fjarskiptastofnunar með markaðsgreiningunni er að greina stöðu samkeppni á fjarskiptamarkaði og leggja á viðeigandi kvaðir til að efla samkeppi, sé hún ekki talin vera nægjanlega virk, eins og sú niðurstaða sem nú liggur fyrir gefur til kynna. Það er von stofnunarinnar að með þessu mikilvæga skrefi muni samkeppni á farsímamarkaði eflast, neytendum til hagsbóta. Ákvörðun PFS ásamt viðaukum og fylgiskjölum Nánari upplýsingar veitir Hrafnkell V. Gíslason forstjóri Póst- og fjarskiptastofnunar í síma 510-1500. Tölvupóstur: hrafnkell@pta.is
2. febrúar 2007
Útboðsauglýsing - Útgáfa tíðniheimilda fyrir GSM 1800 farsímakerfi
Nánar
Póst- og fjarskiptastofnun mun með heimild í 9.gr., sbr. 11.gr. laga um fjarskipti nr 81/2003, veita tíðniheimildir til starfrækslu tveggja nýrra farsímaneta skv. viðurkenndum GSM stöðlum, að undangenginni auglýsingu og vali milli umsækjenda sem byggt verður á skilmálum sem fram koma hér á eftir. Allt að tveimur umsækjendum verður úthlutað tíðnum. Sérhver tíðniheimild gildir fyrir allt landið og mun fela í sér eitt eftirtalinna tveggja tíðnisviða, sem hvert um sig er samtals 2 x 7,4 MHz , alls 14,8 MHz: 1) 1751,1-1758,5 MHz / 1846,1-1853,5 MHz 2) 1758,7-1766,1 MHz / 1853,7-1861,1 MHz Afhenda skal umsóknir í afgreiðslu Póst- og fjarskiptastofnunar bæði á pappírs- og tölvutæku formi. Nánari upplýsingar og skilmála er að finna í útboðslýsingu – sjá neðar. Einnig má fá útboðslýsingu á skrifstofu Póst- og fjarskiptastofnunar, Suðurlandsbraut 4, Reykjavík. Hér fyrir neðan má sækja Excel-skjal , sem reiknar út stigafjölda tilboða sem fall af útbreiðslu og hraða uppbyggingar, sem umsækjandi skuldbindur sig til að ná með tilboði sínu. Tilboðum skal skila á skrifstofu Póst- og fjarskiptastofnunar, eigi síðar en þriðjudaginn 3. apríl 2007 kl 11:00. Verða tilboð þá opnuð að viðstöddum fulltrúum þeirra umsækjenda sem þess óska. Lesin verða upp nöfn umsækjenda ásamt tilboðsblaði með stigaútreikningi, sbr. viðauka 1 í útboðslýsingu. Útboðslýsing (PDF) Útreikningur stiga í útboðslýsingu (Excel skjal) Samráð vegna útboðs – samantekt á svörum (PDF) Nánari upplýsingar veitir Hrafnkell V. Gíslason, forstjóri Póst- og fjarskiptastofnunar, s. 510-1500, t-póstur:hrafnkell@pta.is
31. janúar 2007
Útboð á tíðniheimild fyrir farsímakerfi á 450 MHz innan skamms
Nánar
Póst- og fjarskiptastofnun mun bjóða út tíðnisvið fyrir langdrægt stafrænt farsímakerfi sem þjóni landinu öllu og miðunum. Hinu nýja farsímakerfi er ætlað að taka við af núverandi NMT farsímakerfi, en starfrækslu þess verður hætt í árslok 2008. Aðeins einum bjóðenda verður úthlutað tíðnum. Tíðniheimildin mun gilda í 15 ár. Gert er ráð fyrir að tíðniheimild verði gefin út um mitt ár 2007. Haft verður samráð við hagsmunaaðila og hafa þeir frest til kl. 12, miðvikudaginn 14. febrúar 2007 til að skila inn umsögnum, athugasemdum og ábendingum. Samráðsgögnin má nálgast hér neðar. Samráð við hagsmunaaðila um útboð á 450 MHz tíðnisviðinu (PDF) Nánari upplýsingar veitir Hrafnkell V. Gíslason, forstjóri Póst- og fjarskiptastofnunar, s. 510-1500, t-póstur:hrafnkell@pta.is
29. janúar 2007
Ákvörðun Póst- og fjarskiptastofnunar í ágreiningsmáli um gildistíma frelsisnúmers
Nánar
Póst- og fjarskiptastofnun hefur birt ákvörðun í ágreiningsmáli um gildistíma frelsiskorts. Þann 21. nóvember 2006 barst Póst og fjarskiptastofnun kvörtun þess efnis að Og fjarskipti ehf. (Vodafone) áskilji sér rétt til þess að loka frelsisnúmeri, án þess að endurgreiða hugsanlega inneign notanda, ef ekki er lagt inn á kortið í þrjá mánuði. Í ákvörðuninni kemur fram að PFS telur skilmála Og fjarskipta ehf. um gildistíma talfrelsis, eins og honum hafi verið beitt, ekki brjóta gegn lögum um fjarskipti nr. 81/2003. Hins vegar beri fyrirtækinu að endurskoða orðalag hans í samræmi við þau sjónarmið Póst- og fjarskiptastofnunar sem fram koma í forsendum ákvörðunarinnar. Sjá ákvörðunina í heild: Ákvörðun nr. 1/2007 í ágreiningsmáli um gildistíma frelsisnúmers (PDF) Allar ákvarðanir Póst- og fjarskiptastofnunar eru birtar í tímaröð undir tenglinum Ákvarðanir og úrskurðir hér til vinstri.
16. janúar 2007
Ákvörðun PFS um framlag til Símans úr jöfnunarsjóði alþjónustu
Nánar
Þann 7. desember 2006 kynnti Póst- og fjarskiptastofnun Símanum ákvörðun sína um framlag til Símans hf. úr jöfnunarsjóði alþjónustu vegna ársins 2005. Framlagið er vegna veitingar gagnaflutningsþjónustu með 128 Kb/s flutningsgetu og skv. ákvörðun PFS nemur það kr. 18.880.079, fyrir árið2005. Í ákvörðun PFS er tiltekið að hún er kæranleg til úrskurðarnefndar fjarskipta- og póstmála, sbr. 13. gr. laga nr. 69/2003, um Póst- og fjarskiptastofnun. Síminn hefur kært ákvörðunina og er hún til meðferðar hjá úrskurðarnefndinni. Ákvörðun PFS um framlag til Símans hf. úr jöfnunarsjóði alþjónustu (PDF)
4. janúar 2007
Ný skýrsla um áhrif sambandsrofa í millilandasamskiptum
Nánar
Póst- og fjarskiptastofnun hefur látið vinna skýrslu um áhrif sambandsrofa í millilandasamskiptum. Skýrslan var unnin í desember sl. af ParX Viðskiptaráðgjöf IBM. Skýrsluhöfundum var falið að leggja mat á þjóðhagsleg áhrif þess að rof verði á fjarskiptasamböndum Íslands við umheiminn og hagkvæmni tímasetningar lagningar nýs strengs, FARICE-2. Í dag tengjast fjarskipti Íslands við umheiminn tveimur sæstrengjum, CANTAT-3 og FARICE-1. CANTAT-3 er byggður upp á gamalli tækni og er dýr í rekstri. Megin niðurstaða skýrsluhöfunda er að það sé þjóðhagslega hagkvæmt að ráðist verði í lagningu nýs sæstrengs fyrr en síðar og að hagkvæmara væri fyrir Íslendinga að standa nú þegar að uppbyggingu á nýjum streng, frekar en fresta lagningu hans. Sjá skýrsluna í heild:Áhrif sambandsrofa í millilandasamskiptum og tímasetning lagningar nýs strengs. (PDF)
3. janúar 2007
Nýjar reglur um innanhússfjarskiptalagnir
Nánar
Póst- og fjarskiptastofnun hefur sett reglur um innanhússfjarskiptalagnir sem birtar voru í Stjórnartíðindum 29. desember sl. Reglur um innanhússfjarskiptalagnir nr. 1109/2006 (PDF)
29. desember 2006
Útboð á tveimur tíðniheimildum fyrir GSM 1800 farsímakerfi innan skamms
Nánar
Póst- og fjarskiptastofnun mun bjóða út tíðnisvið fyrir GSM 1800 farsíma innan skamms.Gert er ráð fyrir að tíðniheimildir verði gefnar út í byrjun annars ársfjórðungs 2007.Haft verður samráð við hagsmunaaðila og hafa þeir frest til kl. 12, miðvikudaginn 17. janúar 2007 til að skila inn umsögnum, athugasemdum og ábendingum. Samráðsgögnin má nálgast hér neðar. Tilgangur með þessu útboði er að auglýsa eftir umsóknum frá aðilum, sem ekki hafa tíðniheimildir á GSM 1800 tíðnisviðinu. PFS telur að útgáfa tíðniheimilda til nýrra aðila sé til þess fallin að efla samkeppni á fjarskiptamarkaði hér á landi. Því er ekki gert ráð fyrir að núverandi rétthafar tíðniheimilda fyrir GSM farsímakerfi á Íslandi taki þátt í útboði þessu. Allt að tveimur bjóðendum verður úthlutað tíðnum. Sett verða skilyrði um hraða uppbyggingarinnar í 2 áföngum. Tíðniheimildir munu gilda í 10 ár. Samráðsgögn vegna útboðs (PDF) Nánari upplýsingar veitir Hrafnkell V. Gíslason, forstjóri Póst- og fjarskiptastofnunar, s. 510-1500, t-póstur:hrafnkell@pta.is