Fréttasafn
8. september 2006
Nýr úrskurður frá úrskurðarnefnd fjarskipta- og póstmála
Nánar
Þann 31. ágúst 2006 kom úrskurðarnefnd fjarskipta- og póstmála saman til þess að kveða upp úrskurð um frestun réttaráhrifa í ágreiningsmáli nr. 13/2006. Og fjarskipti ehf. gegn Póst- og fjarskiptastofnun. Hafnað var kröfu Dagsbrúnar hf. um frestun réttaráhrifa ákvörðunar Póst- og fjarskiptastofnunar frá 20. júlí 2006. sjá nánar
1. september 2006
Nýr úrskurður frá úrskurðarnefnd fjarskipta- og póstmála
Nánar
Þann 24. ágúst kom úrskurðarnefnd fjarskipta- og póstmála saman til að kveða upp úrskurð í ágreiningsmáli nr. 9/2006 er varðar greiðslu starfrækslugjalda. Með úrskurðinum er ákvörðun Póst- og fjarskiptastofnunar frá 27. apríl 2006 að hluta til felld úr gildi. Sjá nánar: nr. 9/2006 - Síminn hf. gegn Póst- og fjarskiptastofnun og Samgönguráðherra.
28. ágúst 2006
Samráð við ESA um markað 15
Nánar
Póst- og fjarskiptastofnun hefur sent til ESA drög að ákvörðun um útnefningu fyrirtækja með umtalsverðan markaðsstyrk og álagningu kvaða á markaði fyrir aðgang og upphaf símtala í almennum farsímanetum (markaður 15). sjá nánar
24. ágúst 2006
Ákvörðun í kvörtunarmálum varðandi óumbeðin fjarskipti
Nánar
Þann 16.ágúst tók PFS ákvörðun í kvörtunarmálum varðandi óumbeðin fjarskipti...(PDF)
1. ágúst 2006
Framlengdur frestur til að skila athugasemdum við markaðsgreiningar.
Nánar
Frestur til að skila athugasemdum við frumdrög greininga á mörkuðum fyrir leigulínur (markaðir 7, 13 og 14) hefur verið framlengdur til 15. ágúst nk.
26. júlí 2006
Tveir úrskurðir frá úrskurðarnefnd fjarskipta- og póstmála
Nánar
Hér á vefnum birtast nú tveir úrskurðir úrskurðarnefndar fjarskipta- og póstmála. Annars vegar er um að ræða úrskurð í máli Símans hf. gegn Póst- og fjarskiptastofnun og Orkuveitu Reykjavíkur. Hins vegar úrskurð í máli Ríkislögreglustjóra og Neyðarlínunnar hf. gegn Póst- og fjarskiptastofnun.
25. júlí 2006
Fréttatilkynning vegna útnefningar á farsímamarkaði 16
Nánar
Ákvörðun PFS um útnefningu Símans og Og Vodafone með umtalsverðan markaðsstyrk í lúkningu símtala í eigin farsímanetum og lækkun lúkningarverðs fyrir símtöl í GSM farsímanet Póst- og fjarskiptastofnun (PFS) hefur nú lokið greiningu á markaði fyrir lúkningu símtala í einstök farsímanet. Á grundvelli niðurstaðna úr markaðsgreiningunni hefur PFS ákveðið að útnefna Símann með umtalsverðan markaðsstyrk í lúkningu símtala í eigin GSM og NMT farsímanet og Og Vodafone með umtalsverðan markaðsstyrk í lúkningu símtala í eigin GSM farsímanet. PFS hefur ákveðið að leggja eftirfarandi kvaðir á Símann vegna NMT kerfisins: Kvöð um aðgang að NMT farsímaneti, kvöð um jafnræði og kvöð um eftirlit með gjaldskrá. Á grundvelli kvaðar um eftirlit með gjaldskrá er lögð sú skylda á Símann að bjóða ekki hærri verð fyrir lúkningu á símtölum í NMT kerfinu en voru í gildi samkvæmt gjaldskrá þann 31. desember 2005. Jafnframt hefur PFS ákveðið að leggja eftirfarandi kvaðir á bæði farsímafélögin vegna GSM farsímakerfanna: Kvöð um aðgang að GSM farsímaneti, kvöð um gagnsæi, kvöð um jafnræði, kvöð um bókhaldslegan aðskilnað og kvöð um eftirlit með gjaldskrá. Á grundvelli kvaðar um eftirlit með gjaldskrá í GSM farsímanetum hefur PFS ákveðið að leggja þær skyldur á farsímafélögin að lækka og jafna gjaldskrá fyrir lúkningarverð í eigin GSM farsímaneti í kr. 7,49 í fjórum jöfnum þrepum. Í dag eru lúkningarverð Símans kr. 8,92 á mínútuna og tengigjald kr. 0,68 og hjá Og Vodafone er mínútan á dagtaxta kr. 13,2 og á næturtaxta kr. 11,0 (meðallúkningarverð Og Vodafone er kr. 12,10) og tengigjald 0,99 kr. Til að tryggja jafnræði þá hefur PFS ákveðið að félögin skulu bjóða aðeins eitt verð fyrir lúkningu símtals hvort sem um dag, kvöld eða helgi er að ræða. Fyrsta lækkun á lúkningarverðum er þann 1. september nk., önnur lækkun 1. júní 2007, þriðja lækkun 1. desember 2007 og sú fjórða 1. júní 2008. Tengigjöld skulu einnig falla niður. Borið hefur á kvörtunum frá neytendum um að þeir eigi erfitt með að greina kostnað fyrir GSM farsímaþjónustu þegar hringt er á milli neta annars vegar og innan nets viðkomandi farsímafélags hins vegar. Með því að jafna lúkningarverð er ein meginforsenda fyrir mismunandi verðlagningu fyrir símtöl innan og utan kerfa farsímafélaganna ekki lengur til staðar. Markmið fjarskiptalöggjafarinnar og Póst- og fjarskiptastofnunar með markaðsgreiningunni er að greina stöðu samkeppni á fjarskiptamarkaði og leggja á viðeigandi kvaðir til að efla samkeppi, sé hún ekki talin vera nægjanlega virk eins og sú niðurstaða sem nú liggur fyrir gefur til kynna. Það er von stofnunarinnar að með þessu mikilvæga skrefi muni samkeppni á farsímamarkaði eflast, neytendum til hagsbóta. Búast má við fleiri ákvörðunum stofnunarinnar á seinni hluta ársins í framhaldi af greiningu annarra hluta fjarskiptamarkaðarins og er markaður fyrir aðgang og upphaf símtala í almenn farsímanet næstur. Nánari upplýsingar veitir Hrafnkell V. Gíslason forstjóri Póst- og fjarskiptastofnunar í síma 510-1500. Nánar
24. júlí 2006
Fréttatilkynning vegna netsímaþjónustu
Nánar
Netsíminn er tækninýjung þar sem símaþjónusta er boðin í samræmi við staðla Internetsins. Með netsímanum geta neytendur m.a. nýtt sér kosti flökkuþjónustu sem felst í því að hægt er að tengjast símkerfum hvar sem er í heiminum með svipuðum kostnaði og um venjulega heimilisnotkun væri að ræða. Netsímaþjónusta er nú boðin í nær öllum ríkjum Evrópusambandsins og víða annars staðar. Erlendis hefur þjónustan m.a. aukið samkeppni á fjarskiptamarkaði, auðveldað innkomu nýrra markaðsaðila, og leitt til lægra verðs og aukinnar þjónustu við neytendur. Því er spáð að netsímaþjónusta muni smám saman taka alfarið við af hefðbundinni rásaskiptri talsímaþjónustu. Póst- og fjarskiptastofnun (PFS) hóf undirbúning að innleiðingu þjónustunnar hérlendis í lok árs 2004. Á því tímabili var haft víðtækt samráð við hagsmunaaðila. Jafnframt var sérstakt samráð haft við Neyðarlínuna um þau atriði sem snúa að staðsetningarupplýsingum. Í því samráðsferli komu fram nokkrir annmarkar á netsímaþjónustu hvað varðar öryggi, t.d. að enn hefur ekki verið sett á markaðinn lausn sem gerir kleift að staðsetja netsíma á sama hátt og almennir heimilissímar eru staðsettir í kerfi Neyðarlínunnar í dag. Til mótvægis við þessa annmarka var ákveðið að skilgreina sérstaka númeraröð fyrir flökkuþjónustu, að merkja sérstaklega þau símanúmer sem flutt væru úr almennun númeraröðum yfir í netsímaþjónustu og að fjarskiptafélög skyldu upplýsa neytendur sérstaklega um þá annmarka sem er á netsímaþjónustu hvað varðar þennan öryggisþátt. PFS tók ákvörðun um að heimila netsímaþjónustu m.a. á grundvelli þess að Neyðarlínan gerði ekki athugasemdir við fyrirætlanir stofnunarinnar eins og þær birtust í yfirlýsingu um netsímaþjónustu frá 3. febrúar 2006. Í kjölfar hennar hófu markaðsaðilar að innleiða og bjóða netsímaþjónustu. Það kom því PFS á óvart að Neyðarlínan skyldi kæra bráðabirgðaákvörðun stofnunarinnar í ágreiningsmáli því sem verið hefur til umræðu í fjölmiðlum undanfarið og nýlegur úrskurður úrskurðarnefndar fjarskipta- og póstmála tók til. Varðaði það mál synjun Símans um að flytja símanúmer yfir í netsímaþjónustu hjá Atlassíma. Samkvæmt bráðabirgðaákvörðun PFS var það mat stofnunarinnar að ágreiningsefni málsins væri óskylt miðlun staðsetningaupplýsinga í netsímaþjónustu almennt. Í ljósi þess að umrædd fjarskiptafyrirtæki hafa nú leyst úr ágreiningi sínum með sátt, telst málinu hins vegar lokið af hálfu stofnunarinnar. PFS tekur undir þau sjónarmið sem komið hafa fram um mikilvægi þess að stuðla að öryggi símnotenda eins og framast er unnt, m.a. varðandi miðlun staðsetningarupplýsinga. Er það sannfæring stofnunarinnar að innan tíðar muni koma á markaðinn lausnir sem duga til að staðsetja símnotendur netsímans í neyðartilfellum. Með þetta í huga, og í ljósi þess að sama þróun á sér stað í nær öllum nágrannaríkjum okkar, taldi PFS hag neytenda best borgið með því að heimila netsímaþjónustu. Stofnunin vill að lokum benda á að samkvæmt fjarskiptalögum er fjarskiptafyrirtækjum ekki skylt að miðla staðsetningarupplýsingum til neyðarþjónustuaðila, þ.m.t. lögreglunnar. Hins vegar hefur samstarf milli hagsmunaaðila leitt til þess að við Íslendingar búum við gott kerfi neyðarbjörgunar sem full ástæða er til að standa vörð um. Ljóst er að vegna mikillar og hraðrar tækniþróunar, sem birtist m.a. í samruna fjarskipta og upplýsingatækni, mun útfærsla lausna á þessu sviði vera viðvarandi verkefni næstu ár. Í þeirri vinnu verða allir aðilar að vera samstíga og taka höndum saman um að útfæra lausnir sem tryggja öryggi neytenda að teknu tilliti til sjónarmiða um persónuvernd. Hér má sjá yfirlýsingu Póst- og fjarskiptastofnunar varðandi netsímaþjónustu frá því í febrúar 2006. Nánari upplýsingar veitir Hrafnkell V. Gíslason, forstjóri Póst- og fjarskiptastofnunar, s. 510-1500, t-póstur:hrafnkell@pta.is