Fréttasafn
1. ágúst 2013
PFS framlengir samráðsfrest vegna breytinga á viðmiðunartilboðum Símans um aðgang að talsímakerfi félagsins
Nánar
Póst- og fjarskiptastofnun hefur ákveðið að framlengja samráðsfrest vegna viðmiðunartilboðs Símans um samtengingu talsímaneta (RIO) og viðmiðunartilboðs um endursöluaðgang að talsímaneti félagsins. Athugasemdir hagsmunaaðila skulu berast stofnuninni á netfangið hulda(hjá)pfs.is, eigi síðar en föstudaginn 16. ágúst n.k. Ekki verður unnt að veita frekari frest til að koma með athugasemdir.
30. júlí 2013
PFS heimilar hækkun á heildsöluverðum Mílu og breytingar á viðmiðunartilboði Símans
Nánar
Póst- og fjarskiptastofnun (PFS) birtir nú þrjár ákvarðanir. Í ákvörðun nr. 15/2013 samþykkir stofnunin 8,6% hækkun á heildsöluverðum Mílu fyrir leigu á koparheimtaugum. Verð fyrir fullan aðgang að koparheimtaug verður þá 1.386 kr. Tekur hækkunin gildi þann 1. ágúst nk. í samræmi við það sem fram kom í fyrirhugaðri ákvörðun sem birt var markaðsaðilum til umsagnar þann 5. júní sl. Í ákvörðun nr. 16/2013 samþykkir stofnunin 1,9-8,6% hækkun á heildsöluverðum Mílu fyrir aðgang að lúkningarhluta leigulína. Um er að ræða hækkun sem tengist beint þeirri hækkun á heimtaugaleiguverði sem að framan er rakin. Tekur sú hækkun einnig gildi þann 1. ágúst nk. í samræmi við það sem fram kom í fyrirhugaðri ákvörðun sem birt var markaðsaðilum til umsagnar þann 14. júní sl. Í ákvörðun nr. 17/2013 samþykkir PFS nánar tilteknar breytingar á viðmiðunartilboði Símans um samtengingu talsímaneta (RIO). Um er að ræða smávægilegar breytingar sem fyrst og fremst varða þjónustuleiðina „Fast forval – einn reikningur“ eða FFER. Sjá nánar: Ákvörðun PFS nr. 15/2013 um endurskoðun á gjaldskrá Mílu fyrir koparheimtaugar (pdf) Viðauki – Álit ESA (pdf) Ákvörðun PFS nr. 16/2013 um breytingu á gjaldskrá Mílu fyrir lúkningarhluta leigulína (pdf) Viðauki I – Gjaldskrá Mílu (pdf) Viðauki II – Álit ESA (pdf) Ákvörðun PFS nr. 17/2013 um breytingar á viðmiðunartilboði Símans um samtengingu talsímaneta (RIO) (pdf) Viðauki – Álit ESA (pdf)
18. júlí 2013
Ákvörðun PFS um viðbótarafslátt vegna reglubundna viðskipta með magnpóst
Nánar
Póst- og fjarskiptastofnun hefur birt ákvörðun sína nr. 14/2013, um breytingar á viðskiptaskilmálum Íslandspósts að því er varðar viðbótarafslátt vegna reglubundina viðskipta fyrir magnpóst. Forsaga málsins er sú að með úrskurði úrskurðarnefndar fjarskipta- og póstmála nr. 5/2012 felldi nefndin úr gildi þann hluta af ákvörðun PFS nr. 16/2012, sem fjallaði um viðbótarafslátt vegna reglubundina viðskipta með þeim rökum að rökstuðning hafi skorti fyrir þeim afsláttarprósentum sem ákveðnar voru. Í hinni nýju ákvörðun hefur verið bætt úr þeim annmörkum sem nefndin taldi að væri á hinni fyrri ákvörðun um þetta tiltekna atriði.
4. júlí 2013
Ný norræn samanburðarskýrsla um fjarskiptanotkun
Nánar
Í dag kemur út skýrsla sem fjarskiptaeftirlitsstofnanir á Norðurlöndunum, ásamt Eistlandi og Litháen hafa tekið saman um notkun helstu þátta fjarskiptaþjónustu og þróun nýliðinna ára í löndunum sjö. Þetta er fjórða árið í röð sem fjarskiptanotkun íbúa Norðurlandanna er borin saman, en nú hafa tvö Eystrasaltslönd bæst í hópinn, þ.e. Eistland og Litháen. Á heildina litið er fjarskiptanotkun mjög lík í Norðurlöndum og íbúar þeirra nýta sér sambærilega tækni á svipaðan máta. Þrátt fyrir það má þó víða sjá einhvern mun á notkun og þróun einstakra þátta. Breiðbandsnotkun með farsímum, spjaldtölvum og netlyklum er minnst útbreidd á Íslandi af Norðurlöndunum fimm, en í því sambandi ber þess að geta að útbreiðsla þriðju kynslóðar farsímaneta hófst tveimur til þremur árum fyrr í hinum löndunum fjórum. Athyglisvert er að Íslendingar virðast nota farsímann minna en samanburðarþjóðirnar til að senda skilaboð því við sendum færri SMS en tíðkast í flestum hinna landanna. Aðeins Eistar nota SMS skilaboð minna en Íslendingar.
2. júlí 2013
Úrskurðarnefnd fellir úr gildi gildistöku lækkunar lúkningarverða
Nánar
Með úrskurði sínum nr. 6/2012, dags. 30. júní sl., hefur úrskurðarnefnd fjarskipta- og póstmála fellt úr gildi þann hluta ákvörðunar Póst- og fjarskiptastofnunar (PFS) nr. 32/2012 er snéri að lækkun lúkningarverða íslenskra farsímafyrirtækja í heildsölu úr 4 kr./mín. í 1,66 kr./mín. sem taka átti gildi þann 1. júlí sl. og gilda út árið 2013. PFS ákvarðaði umrætt verð með verðsamanburði við þau ríki innan EES sem beittu nánar tiltekinni kostnaðargreiningaraðferð sem Eftirlitsstofnun EFTA (ESA) mælti fyrir í tilmælum sínum að skyldi notuð í þessu sambandi. Samkvæmt ákvörðun PFS nr. 3/2012 skyldi PFS framkvæma slíkan verðsamanburð árlega eigi síðar en 1. nóvember ár hvert og skyldu þau verð gilda fyrir næsta ár á eftir. Nova kærði ákvörðun PFS nr. 32/2012 til úrskurðarnefndarinnar og krafðist þess að hún yrði felld úr gildi. Byggði félagið málatilbúnað sinn á því að fjarskiptalög heimiluðu PFS ekki að framkvæma verðsamanburð með þeim hætti sem gert var, auk þess sem stofnunin hefði brotið gegn rannsóknarreglu og meðalhófsreglu stjórnsýslulaga við ákvörðun sína. Í niðurstöðu úrskurðarnefndar kom fram að með ákvörðun PFS nr. 3/2012 hefði PFS ákveðið að endanleg ákvörðun um lúkningarverð yrði byggð á verðsamanburði. Jafnframt hefði þar verið tekin ákvörðun um hvaða aðferðarfræði skyldi beitt við slíkan samanburð. Kærandi hefði ekki kært þá ákvörðun. Þeim þætti kærunnar var því vísað frá úrskurðarnefnd. Úrskurðarnefnd hafnar því að PFS hafi við umræddan verðsamanburð brotið gegn rannsóknarreglu stjórnsýslulaga. Úrskurðarnefnd fellir hins vegar úr gildi þann hluta hinnar kærðu ákvörðunar sem snýr að gildistöku hennar 1. júlí sl. þar sem hún telur að PFS hafi brotið gegn meðalhófsreglu stjórnsýslulaga. Fram kom að ákvörðunin hefði miðað að því að færa heildsölugjöld fyrir lúkningu símtala hjá fjarskiptafyrirtækjum hér á landi sem fyrst til samræmis við tilmæli ESB og ESA, svo og athugasemdir ESA. Úrskurðarnefnd er sammála PFS um að það sé lögmætt markmið með stjórnsýslu PFS að færa umrædd lúkningargjöld eins fljótt og auðið er til samræmis við tilmæli ESA. Úrskurðarnefndin telur þó að við ákvörðun um það hvenær lúkningarverð kæmi til framkvæmda samkvæmt hinni kærðu ákvörðun, hefði skipt máli að á þeim tíma sem verðsamanburðurinn fór fram höfðu aðeins 7 af 30 samanburðarríkjum ákveðið að beita umræddri kostnaðargreiningaraðferð og ákveðið lúkningarverð á grundvelli hennar, með gildistöku fyrir eða frá 1. júlí sl. Samkvæmt nýjustu upplýsingum sem nefndin hafði við vinnslu málsins höfðu þá 20 ríki ákveðið að byggja lúkningarverð á umræddri kostnaðargreiningaraðferð. Af þeim hefðu hin lækkuðu verð tekið gildi í 13 ríkjum þann 1. júlí sl. en myndu taka gildi í 7 ríkjum síðar á árinu 2013 eða á árinu 2014. Skv. framansögðu hefðu því 13 ríki, eða tæplega helmingur EES ríkjanna, tekið upp umrædda kostnaðargreiningaraðferð á sama tíma og hin kærða ákvörðun PFS kvað á um. Í ljósi þess hversu mörg samanburðarríkjanna hafa ákveðið seinni gildistökutíma eða ekki tekið neina ákvörðun um upptöku umræddrar kostnaðargreiningaraðferðar og að um íþyngjandi ákvörðun sé að ræða, telur úrskurðarnefnd að ekki hafi verið nauðsynlegt að láta það lúkningarverð sem ákveðið hefði verið í hinni kærðu ákvörðun taka gildi frá 1. júlí 2013. Því fellir nefndin umræddan gildistökutíma brott í hinni kærðu ákvörðun en gerir ráð fyrir að PFS taki nýja ákvörðun um lúkningarverð fyrir 1. nóvember nk. sem gilda skal frá 1. janúar 2014, í samræmi við framangreinda ákvörðun PFS nr. 3/2012. Úrskurðarnefnd gerir því ekki athugasemdir við fjárhæð þess lúkningarverðs sem PFS hefur ákvarðað, né þá aðferðarfræði sem stofnunin beitti við þann útreikning. Einungis að ekki hafi verið nauðsynlegt að lækkunin tæki gildi þann 1. júlí sl. Af ofangreindum úrskurði úrskurðarnefndar leiðir að einhver bið verður á því að íslenskir neytendur muni njóta góðs af þeim lækkuðu lúkningargjöldum sem PFS hafði mælt fyrir um. Þróunin í Evrópu síðustu misseri er í átt að ört lækkandi lúkningargjöldum þótt einstaka ríki hafi séu styttra komin en önnur í þessum efnum. Sjá úrskurðinn í heild:Úrskurður úrskurðarnefndar fjarskipta- og póstmála í máli nr. 6/2012 - Nova gegn Póst- og fjarskiptastofnun (PDF)
28. júní 2013
PFS kallar eftir samráði vegna breytinga á viðmiðunartilboðum Símans um aðgang að talsímakerfi félagsins
Nánar
Þann 26. júní sl. óskaði Síminn eftir samþykki Póst- og fjarskiptastofnunar (PFS) fyrir tilteknum breytingum á viðmiðunartilboði félagsins um samtengingu talsímaneta (RIO) og viðmiðunartilboði um endursöluaðgang að talsímaneti félagsins. Þær breytingar sem Síminn óskar eftir á báðum viðmiðunartilboðunum eru neðangreindar verðskrárbreytingar í viðaukum 1 í viðmiðunartilboðunum, sem Síminn segir tilkomnar vegna hækkunar á heimtaugarleigugjaldskrá Mílu sem áformað er að taki gildi frá 1. ágúst nk. Þar sem viðmiðunartilboð Símans um endursöluaðgang frá september 2012 hefur ekki farið í samráð áður gefst hagsmunaaðilum kostur á að gera athugasemdir við öll þau atriði sem þeir telja að betur mættu fara, án tillits til þess hvort Síminn og/eða PFS hafa gert athugasemdir við þau. PFS óskar eftir viðbrögðum fjarskiptafyrirtækja og annarra hagsmunaaðila við ofangreindum fyrirætlunum Símans og ennfremur þeim breytingum sem PFS hyggst mæla fyrir um. Breytingartillögur Símans má sjá í skjölunum sjálfum hér að neðan: Frestur til að skila inn umsögnum og athugasemdum er til og með 9. ágúst 2013. Umsagnir skal senda til Huldu Ástþórsdóttur (hulda(hjá)pfs.is) Sjá nánari upplýsingar og samráðsskjöl
27. júní 2013
Samráð við ESA um breytingar Símans á viðmiðunartilboði um samtengingu (RIO)
Nánar
Í dag sendi Póst- og fjarskiptastofnun (PFS) drög að ákvörðun um breytingar á viðmiðunartilboði Símans um samtengingu talsímaneta (RIO) til ESA, Eftirlitsstofnunar EFTA. Um er að ræða smávægilegar breytingar sem fyrst og fremst varða þjónustuleiðina „Fast forval – einn reikningur“ eða FFER. PFS efndi nýverið til samráðs við markaðsaðila um hina fyrirhuguðu ákvörðun. Aðeins bárust athugasemdir frá Fjarskiptum hf. (Vodafone) en athugasemdir félagsins snéru þó ekki beint að þeim breytingum sem Síminn óskaði eftir og því hafa ekki verið gerðar breytingar á drögunum. Drög að umræddri ákvörðun er nú send til ESA og annarra eftirlitsstofnana á EES-svæðinu til samráðs með vísan til 7. gr. laga nr. 69/2003 um Póst- og fjarskiptastofnun og 7. gr. rammatilskipunar ESB nr. 2002/21/EB. Umræddir aðilar hafa einn mánuð til að setja fram athugasemdir við ákvörðunardrögin. Eftir það getur PFS formlega tekið ákvörðun nema fram komi óskir frá ESA um að PFS dragi ákvörðunardrögin til baka. Sjá nánar hér á vefnum:Upplýsingar og skjöl varðandi samráð við ESA um breytingar Símans á viðmiðunartilboði um samtengingu talsímaneta (RIO)
27. júní 2013
Net- og upplýsingaöryggisstofnun Evrópu með nýtt umboð og víðara starfssvið
Nánar
Frá árinu 2004 hefur verið starfandi öryggisstofnun Evrópusambandsins á sviði net- og upplýsingaöryggis, ENISA (European Network and Information Security Agency). Íslendingar hafa áheyrnaraðild að stofnuninni í gegn um EES samninginn og hafa frá upphafi tekið þátt í starfi hennar með ýmsum hætti, m.a. með þátttöku í æfingum varðandi viðbrögð við netárásum. T.d. tók netöryggissveit Póst- og fjarskiptastofnunar, CERT-ÍS, þátt í samevrópskri æfingu á viðbrögðum við netárásum sem skipulögð var af ENISA á síðasta ári. Þann 19. júní sl. tók gildi ný reglugerð ESB um ENISA og hefur stofnunin fengið nýtt starfsumboð til næstu 7 ára, eða til ársins 2020. Í reglugerðinni er starfssvið stofnunarinnar einnig víkkað talsvert út frá því sem verið hefur. M.a. fær hún ríkara hlutverk í baráttunni gegn netglæpum með auknu samstarfi við netglæpamiðstöð Europol. Einnig mun stofnunin koma með virkari hætti að stefnumörkun og regluverki Evrópusambandsins varðandi netöryggi. Sjá nánar í fréttatilkynningu á vef ENISA