Fréttasafn
2. nóvember 2012
Ákvörðun PFS vegna kvartana um reikningagerð Hringdu ehf.
Nánar
Póst- og fjarskiptastofnun (PFS) hefur birt ákvörðun sína nr. 28/2012, vegna tveggja kvartana um reikningagerð Hringdu ehf. Töldu báðir kvartendur að reikningagerð á vegum fyrirtækisins uppfyllti ekki kröfur reglugerðar nr. 526/2011 um reikningagerð, þar sem þeim bærust ekki sundurliðaðir reikningar frá félaginu og væri því ókleift að sjá hvað lægi að baki þeirri heildarfjárhæð sem þeim væri gert að greiða fyrir þjónustu félagsins. PFS benti Hringdu m.a. á að út frá skýru orðalagi 38. gr. fjarskiptalaga væri ljóst að áskrifendur tal- og farsímaþjónustu ættu rétt á að fá reikninga fyrir fjarskiptanotkun sína sundurliðaða, frá þeim fjarskiptaþjónustuaðila sem þeir eiga viðskipti við. Vísaði stofnunin í því sambandi til áðurnefndrar reglugerðar nr. 526/2011. Taldi PFS það því engum vafa undirorpið að í gildi væru skýrar reglur fyrir fjarskiptafyrirtæki um birtingu, fyrirkomulag og gerð reikninga fyrir fjarskiptaþjónustu, enda hljóti það að teljast grundvallarforsenda allra viðskipta að fyrirtæki sendi reikning til viðskiptamanna sinna vegna aðkeyptrar þjónustu, þar sem fram kemur með skýrum hætti fyrir hvað viðkomandi reikningur stendur, og viðskiptavinurinn sé þannig upplýstur um sín kaup og kjör hverju sinni. Það er því m.a. niðurstaða PFS að sú háttsemi Hringdu ehf. að sundurliða ekki reikninga kvartenda hafi brotið gegn 1. mgr. 38. gr. laga nr. 81/2003, um fjarskipti, sbr. 6. gr. og 7. gr. reglugerðar nr. 526/2011, um reikningagerð fyrir fjarskiptaþjónustu. Er fyrirtækinu gert að endurskoða reikingagerð sína með tilliti til ofangreindrar reglugerðar. Ennfremur skal fyrirtækið upplýsa Póst- og fjarskiptastofnun um fyrirkomulag félagsins að því er varðar birtingarhátt reikninga til viðskiptavina sinna almennt, auk þess sem því ber að afhenda stofnuninni almenna og staðlaða fyrirmynd að reikningum félagsins fyrir 30. desember n.k Sjá ákvörðunina í heild:Ákvörðun PFS nr. 28/2012 vegna kvartana um reikningagerð Hringdu ehf. (PDF)
1. nóvember 2012
Ákvörðun PFS um lækkun lúkningarverðs bætir hag neytenda á farsímamarkaði
Nánar
Póst- og fjarskiptastofnun (PFS) hefur birt ákvörðun sína nr. 32/2012 varðandi heildsölugjaldskrá fyrir lúkningu símtala í einstökum farsímanetum (markaður 7). Þær breytingar sem kveðið er á um í ákvörðuninni leiða til þess að ein megin forsendan fyrir mismunandi verði á farsímaþjónustu verður ekki lengur til staðar, þ.e. þegar hringt er í annað farsímafélag en viðkomandi er í viðskiptum við. Samkeppnisvandamál sem PFS hefur greint á þessum markaði má fyrst og fremst rekja til þess að það farsímafyrirtæki sem ræður yfir því farsímaneti þar sem símtalinu lýkur, er með einokunarstöðu á því neti. Flest samkeppnisvandamálin hafa tengst lúkningarverði og að mati PFS hefur í sumum tilvikum átt sér stað yfirverðlagning á símtölum milli kerfa. Kostnaðinum hefur verið velt yfir á þá notendur sem koma inn í kerfið úr öðrum farsíma- eða talsímanetum. Með ákvörðuninni nú og ákvörðun PFS nr. 3/2012 frá 13. janúar sl. sér nú fyrir endann á þessu samkeppnisvandamáli. Í dag eru lúkningarverð farsímafélaganna með þeim hætti að hámarksverð Símans og Vodafone er 4,5 kr./mín, Tals 5,5 kr./mín og Nova og IMC/Alterna 6,3 kr./mín. Samkvæmt ákvörðun PFS nr. 32/2012, sem birt er í dag, verða lúkningarverð allra fyrirtækjanna jöfnuð þann 1. janúar nk. í 4 kr./mín. Þann 1. júlí nk. lækkar verðið svo í 1,66 kr./mín. Með ákvörðuninni telur PFS að mikilvægum áfanga sé náð varðandi jöfnun og lækkun lúkningarverða á íslenskum farsímamarkaði, sem ættu að koma neytendum til góða.Þess má geta að umrædd ákvörðun er sú fjórða sem PFS tekur á viðkomandi markaði frá árinu 2006. Þegar PFS hóf umrætt lækkunarferli á því ári námu hæstu lúkningarverð 15 kr./mín. Ákvörðunin byggir á ákvörðun PFS nr. 3/2012 frá því í janúar sl. þar sem viðkomandi markaður var greindur. Í þeirri ákvörðun komst PFS að þeirri niðurstöðu að Síminn, Vodafone, Nova, Tal og IMC/Alterna væru með umtalsverðan markaðsstyrk á lúkningu símtala í eigin farsímanetum. Viðeigandi kvaðir voru lagðar á félögin, m.a. kvöð um eftirlit með gjaldskrá. Í ákvörðun 3/2012 kom ennfremur fram að PFS myndi framkvæma verðsamanburð á viðkomandi markaði, m.t.t. lúkningarverða á EES-svæðinu, eigi síðar en 1. nóvember 2012. Sá verðsamanburður myndi síðan verða grundvöllur hámarks lúkningarverðs íslenskra farsímafyrirtækja frá og með 1. janúar 2013. PFS skyldi síðan framkvæma slíkan verðsamanburð árlega fyrir umrædd tímamörk vegna lúkningargjalda næsta árs á eftir. Í ágúst sl. efndi PFS til innanlandssamráðs um drög að ofangreindum verðsamanburði. Í kjölfar þess samráðs ákvað stofnunin að fresta innleiðingu hins nýja verðs í 1,66 kr./mín. um hálft ár eða til 1. júlí 2013. Þetta var gert til að koma að nokkru leyti til móts við athugasemdir farsímafyrirtækjanna. Í lok september sl. voru hin uppfærðu drög send Eftirlitsstofnun EFTA (ESA) til samráðs. Með bréfi, dags. 26. október sl., bárust athugasemdir ESA. ESA tók fram að þó svo að umrædd frestun væri ekki í fullu samræmi við tilmæli ESA frá 2011 um lúkningarverð, sem kváðu m.a. á um að verð skyldu lækkuð í kostnaðargreind verð eigi síðar en 1. janúar 2013, væri í þessu tilviki unnt að gefa PFS smávægilegt svigrúm til frestunar umræddrar lækkunar. Væri þá horft til þess að um frekari frestun yrði ekki að ræða. Þar sem markaðsgreiningar eru viðvarandi verkefni PFS má búast við fleiri ákvörðunum stofnunarinnar á næstu misserum í framhaldi af greiningu annarra hluta fjarskiptamarkaðarins. PFS stefnir að því að ljúka annarri umferð greininga allra undirmarkaða fjarskipta á fyrri hluta næsta árs. Sjá ákvörðunina í heild ásamt viðaukum: • Ákvörðun nr. 32/2012 um heildsölugjaldskrá fyrir lúkningu símtala í einstökum farsímanetum (markaður 7)(PDF)• Viðauki A – Heildsölugjaldskrá fyrir lúkningu símtala í einstökum farsímanetum (markaður 7) (PDF)• Viðauki B – Niðurstöður úr samráði PFS um frumdrög að heildsölugjaldskrá fyrir lúkningu símtala í einstökum farsímanetum (markaður 7) (PDF)• Viðauki C – Álit ESA. Sjá nánar um markaðsgreiningar hér á vefnum.
30. október 2012
PFS heimilar Íslandspósti að loka póstafgreiðslustöðum á Flateyri og Bíldudal
Nánar
Póst- og fjarskiptastofnun hefur birt tvær ákvarðanir þar sem stofnunin samþykkir beiðnir Íslandspósts um heimild til að loka póstafgreiðslustöðum. Um er að ræða annars vegar póstafgreiðslu á Flateyri og hins vegar póstafgreiðslu á Bíldudal. Er það mat stofnunarinnar að sú þjónusta sem Íslandspóstur hyggst bjóða íbúum þessara bæjarfélaga í staðinn fullnægi gæðakröfum laga um póstþjónustu nr. 19/2002, sem og þeim skyldum sem hvíla á fyrirtækinu sem alþjónustuveitanda. Sjá ákvarðanirnar í heild: Ákvörðun PFS nr. 30/2012 um lokun póstafgreiðslu á Flateyri (póstnúmer 425) (PDF) Ákvörðun PFS nr.31/2012 um lokun póstafgreiðslu á Bíldudal (póstnúmer 465) (PDF)
29. október 2012
Samráð um skilmála vegna rafræns uppboðs á tíðniheimildum á 800 MHz og 1800 MHz tíðnisviðunum
Nánar
Póst- og fjarskiptastofnun mun halda rafrænt uppboð á tíðniheimildum fyrir farsíma- og farnetsþjónustu á 800 MHz og 1800 MHz tíðnisviðunum í byrjun árs 2013. Gert er ráð fyrir að tíðniheimildir verði gefnar út á fyrsta ársfjórðungi sama árs.PFS auglýsir hér með eftir samráði við hagsmunaaðila um skilmála vegna uppboðsins. Boðin verða upp 60 MHz (2x30 MHz) í samtals fimm tíðniheimildum á 800 MHz tíðnisviðinu og 50 MHz (2x25 MHz) í fimm tíðniheimildum á 1800 MHz tíðnisviðinu. Tíðniheimildirnar fela í sér tímabundna heimild til skilyrtra afnota en leiða hvorki til eignarréttar né varanlegs nýtingar- og ráðstöfunarréttar yfir viðkomandi tíðnisviði. Tíðniheimildir á 1800 MHz verða tæknilega hlutlausar. Tíðniheimildirnar á 800 MHz tíðnisviðinu heimila notkun á hlutaðeigandi tíðnum fyrir farnetsþjónustu og eru bundnar ákveðnum lágmarkskröfum um útbreiðslu og uppbyggingu háhraðafarnetsþjónustu. Á 800 MHz tíðnisviðinu verður um að ræða eina tíðniheimild, 2x10 MHz með 25 ára gildistíma, sem kveður á um að 99.5% lögheimila og sama hlutfall vinnustaða, með heilsársstarfssemi, á öllum fyrirfram skilgreindum landssvæðum, skuli eiga kost á tiltekinni háhraðafarnetsþjónustu. Aðrar tíðniheimildir á tíðnisviðinu eru 2x5 MHz, gilda til 10 ára og fela í sér skuldbindingu um að 93,5% lögheimila og vinnustaða, óháð landsvæðum, skuli eigi kost á tiltekinni háhraðafarnetsþjónustu. Gagnaflutningshraði háhraðafarnetsþjónustunnar, fyrir þá aðila sem nú þegar eru handhafar tíðniheimilda til að veita UMTS þjónustu hér á landi og tengdra aðila, skal vera 2 Mb/s fyrir árslok 2014, 10 Mb/s fyrir árslok 2016 og 30 Mb/s fyrir árslok 2020. Fyrir aðra aðila skal gagnaflutningshraði háhraðafarnetsþjónustunnar vera 10 Mb/s fyrir árslok 2016 og 30 Mb/s fyrir árslok 2020 Ekki eru gerðar útbreiðslu- eða uppbyggingarkröfur í tíðniheimildum á 1800 MHz tíðnisviðinu. Settar eru ákveðnar takmarkanir á stærð tíðnisviða sem sami aðili getur verið tíðnirétthafi að að afloknu uppboði. Hvað varðar 800 MHz tíðnisviðið getur aðili, og aðilar tengdir honum, ekki verið handhafar að stærra tíðnisviði en sem nemur 2x20 MHz. Á 1800 MHz tíðnisviðinu getur aðili, og aðilar tengdir honum, að afloknu uppboði ekki haft yfir að ráða tíðniheimildum til nýtingar en sem nemur 2x15 MHz í heild. Umsögnum, athugasemdum og ábendingum skal skila til PFS fyrir lok mánudagsins 26. nóvember 2012. PFS mun svara hagsmunaaðilum sem senda inn athugasemdir og í birta endanlega skilmála uppboðsins að því loknu. Mun birting skilmálanna auglýst í blöðum og á heimasíðu stofnunarinnar. Nánari upplýsingar vegna samráðsins veitir Unnur Kr. Sveinbjarnardóttir, netfang: unnur(hjá)pfs.is. Ásamt drögum að skilmálunum sjálfum eru eftirfarandi fylgiskjöl hluti af skjalinu hér fyrir neðan: Fylgiskjal 1 - Þátttökublað Fylgiskjal 2 - Yfirlit yfir 1800 MHz tíðnisviðið Fylgiskjal 3 - Skýrsla Mannvits fyrir PFS: Mat á umfangi vegna uppboðs 4G tíðniheimilda Sjá samráðsskjalið í heild: Drög að skilmálum, ásamt fylgiskjölum, vegna uppboðs á tíðniréttindum fyrir farnetsþjónustu á 800 MHz og 1800 MHz tíðnisviðunum(PDF, 8,208 MB) Hér fyrir neðan er hægt að skoða fylgiskjal 3, skýrslu verkfræðistofunnar Mannvits eingöngu:Mat á umfangi vegna uppboðs 4G tíðniheimilda, skýrsla - umfang og kostnaðarmat, unnið fyrir Póst- og fjarskiptastofnun, 29. okt. 2012 (PDF)
9. október 2012
Mælaborð fjarskiptamarkaðarins: Ný og aðgengileg birting tölfræðigagna
Nánar
Póst- og fjarskiptastofnun (PFS) hefur nú opnað Mælaborð fjarskiptamarkaðarins á vef sínum. Mælaborðið birtir tölfræðigögn um fjarskiptamarkaðinn á myndrænan og aðgengilegan hátt. Það er fyrirtækið DataMarket sem hefur útbúið gögnin til birtingar en fyrirtækið hefur sérhæft sig í slíkri framsetningu tölfræðigagna. Myndritin sem nú hafa verið birt eru níu talsins. Um er að ræða valda þætti úr tölfræðiskýrslu PFS um íslenska fjarskiptamarkaðinn fyrir árið 2011. Stofnunin vinnur slíkar skýrslur tvisvar á ári, fyrir hálft ár og heilt ár og verður mælaborðið uppfært reglulega þegar ný tölfræðiskýrsla kemur út. Gögnin nú sýna stöðu og þróun fjarskiptamarkaðarins til ársloka 2011. Mælaborðið er undir tölfræðihluta vefsins á slóðinni: http://pfs.is/maelabord.aspx Sjá einnig Tölfræðiskýrslu PFS um íslenska fjarskiptamarkaðinn 2011 (PDF)
8. október 2012
Samevrópsk æfing í viðbrögðum við netárásum
Nánar
Eftir því sem netárásir í heiminum verða umfangsmeiri og víðtækari verður alþjóðleg samvinna mikilvægari til að hægt sé að bregðast við og verjast truflunum og tjóni sem slíkar árásir geta valdið. Þann 4. október síðastliðinn var haldin samevrópsk æfing í samhæfingu aðgerða gegn alvarlegum og útbreiddum netárásum í Evrópu. Í æfingunni voru sviðsettar víðtækar og útbreiddar netárásir víða í álfunni. Æfingin var skipulögð af Net- og upplýsingaöryggisstofnun Evrópu, ENISA, og var henni fyrst og fremst ætlað að koma á og prófa samskipti og samvinnu viðbragðsaðila milli landa og innan hvers lands, við þær aðstæður sem geta skapast þegar um alvarlegar og umfangsmiklar netárásir er að ræða. Öll lönd Evrópusambandsins og EFTA löndin (Ísland, Noregur, Lichtenstein og Sviss) tóku þátt í æfingunni með einum eða öðrum hætti. Netöryggissveit Póst- og fjarskiptastofnunar, CERT-ÍS, skipulagði framkvæmd æfingarinnar hérlendis og tók þátt í henni fyrir Íslands hönd ásamt fyrirtækjum úr einkageiranum. Þetta er í fyrsta sinn sem Íslendingar taka virkan þátt í slíkri æfingu en árið 2010 var haldin fyrsta samevrópska æfingin gegn netárásum. Þetta var einnig í fyrsta sinn sem bæði opinberir aðilar og aðilar úr einkageiranum tóku sameiginlegan þátt í æfingu af þessu tagi. Þátttaka í æfingunni og skipulagning hennar hér innanlands er fyrsta stóra verkefni netöryggissveitar Póst- og fjarskiptastofnunar, sem tekur formlega til starfa í nóvember nk. Sveitin mun starfa samkvæmt sérstöku ákvæði sem innleitt var í fjarskiptalög með lagabreytingu í júní sl. (Sjá 8. gr. laga nr. 62/2012)Í innanríkisráðuneytinu er nú unnið að reglugerð sem ætlað er að setja nánari fyrirmæli um starfsemi sveitarinnar. Upplýsingar um hlutverk og markmið netöryggissveitarinnar er að finna á heimasíðu hennar, www.cert.is. Sjá einnig frétt um samevrópsku æfinguna, Cyber Europe 2012, á vef Net- og upplýsingaöryggisstofnunar Evrópu, ENISA.
2. október 2012
Ísland kemur vel út í skýrslu um stöðu fjarskipta og upplýsingatækni í Evrópu.
Nánar
Fyrir skömmu kom út skýrsla sem Evrópusambandið lét vinna um stöðu fjarskipta og upplýsingatækni í þeim löndum sem nú teljast taka þátt í stækkunarferli Evrópusambandsins, þ.á.m. á Íslandi. Skýrslan var unnin af alþjóðlega rannsóknarfyrirtækinu Cullen International og er hluti af þriggja ára verkefni (2011 – 2013) sem fyrirtækið vinnur fyrir ESB. Þessi skýrsla er önnur í röðinni af fjórum slíkum skýrslum sem áætlað er að gefnar verði út á þeim þremur árum sem verkefnið stendur, þ.e. til 2013 Í skýrslunni er að finna yfirlit yfir stöðu hinna ýmsu þátta fjarskipta og upplýsingatækni í löndunum sem fjallað um og samanburð við löndin innan ESB, auk þess sem tilhögun eftirlits og staða eftirlitsstofnana er skoðuð. Almennt séð gefur skýrslan jákvæða mynd af stöðu Íslands á þessu sviði. Tiltekið er að Íslendingar séu langt komnir með að laga fjarskiptaumhverfi sitt að lögum og regluverki ESB og í samanburði við ESB löndin og önnur lönd í stækkunarferlinu kemur Ísland vel út á nær öllum sviðum. Auk þess að birta samanburð og fjalla um stöðuna á sviði fjarskipta og upplýsingatækni er horft til framtíðar og þess sem leggja þarf áherslu á varðandi fjarskiptamarkaðinn á næstunni. Varðandi Ísland er í þessari skýrslu lögð áhersla á vinnu við aðra umferð markaðsgreininga, sem nú er í fullum gangi innan PFS. Einnig er sérstaklega talað um endurskipulagningu tíðnimála en PFS setti fram nýja tíðnistefnu á síðasta ári og fyrir dyrum standa útboð á tíðnum á 800 MHz og 1800 MHz, eða svokölluðum 4G tíðnum. Í skýrslunni er lögð áhersla á nauðsyn þess að eftirlitsstofnanir hafi fjárhagslegt sjálfstæði og valdheimildir til að fylgja eftirlitshlutverki sínu eftir. Varðandi Ísland er sérstaklega bent á að styrkja þurfi þessa tvo þætti hjá eftirlitsstofnuninni, þ.e. Póst- og fjarskiptastofnun. Upplýsingum sem fram koma í skýrslu Cullen var safnað hér á landi með aðstoð ýmissa aðila, m.a. Póst- og fjarskiptastofnunar. Skýrsluna má nálgast á vef Cullen International. Þar er einnig að finna fyrri skýrsluna sem kom út haustið 2011.
1. október 2012
Ákvörðun PFS í kvörtunarmáli vegna uppsetningar og frágangs Gagnaveitu Reykjavíkur á ljósleiðaralögnum
Nánar
Póst- og fjarskiptastofnun (PFS) hefur birt ákvörðun sína nr. 26/2012, vegna kvörtunar um frágang ljósleiðaralagna Gagnaveitu Reykjavíkur ehf. (GR). Taldi kvartandi m.a. að frágangi og uppsetningu fjarskiptalagnanna væri verulega ábótavant og krafðist þess að PFS tæki til skoðunar hvort frágangur væri í samræmi við gildandi lög og afleiddar heimildir auk þess sem kvartandi óskaði eftir áliti PFS á málinu í heild. PFS leitaði til faggilds og óháðs skoðunaraðila, til þess að skoða og meta hvort umræddar fjarskiptalagnir og frágangur á þeim væru í samræmi við lög og reglur og gildandi staðla um fjarskiptalagnir, sbr. ÍST 150:2009 og TS 151:2009. Með tilliti til skýrslu skoðunaraðila og fyrirliggjandi gagna í málinu, kemst PFS að þeirri niðurstöðu, að ýmsa vankanta sé að finna á frágangi lagnar og leggur fyrir GR að bæta úr þeim. Hins vegar bendir PFS á að tiltekin atriði, er ekki varða öryggi, séu frávíkjanleg að því gefnu að samkomulag um það náist á milli GR og viðeigandi aðila. Ennfremur kemst stofnunin að þeirri niðurstöðu að inntak ljósleiðara fyrir umræddar íbúðir og staðsetning húskassa, sem tengja skal við hvert inntak, sé ekki í samræmi við kröfur ákvæða 4. og 6. gr. reglna nr. 1109/2006 um innanhússfjarskiptalagnir, sbr. ÍST 150:2009 og TS 151:2009. Stofnunin telur hins vegar að þótt staðsetning fjarskiptainntaks og húskassa sé ekki í samræmi við reglur og gildandi staðla að öllu leyti, verði að horfa til nokkurra þátta í þeim efnum, s.s. að skv. TS 151:2009 er verkkaupa í sjálfsvald sett hversu ítarlega tæknireglunum er fylgt við uppbyggingu fjarskiptakerfis hans. Að mati stofnunarinnar felur umrædd undantekning það í sér að heimilt sé að víkja frá gildandi staðli og reglum með því skilyrði að verkkaupi (íbúðareigandi) veiti upplýst samþykki sitt fyrir slíkum frávikum, að því gefnu að ekki sé um nýbyggingu að ræða. Einnig verði að horfa til þess að um eldri byggingu er að ræða, þar sem kröfur um búnað og lagnaleiðir miðast við tækni byggingartímans. Þetta kann að leiða til þess að erfitt sé eða mjög kostnaðarsamt að fylgja staðlinum og reglunum eftir í hvívetna. Það er því niðurstaða PFS að þrátt fyrir að inntak ljósleiðara fyrir umræddar íbúðir og staðsetning húskassa sé ekki í samræmi við fyrrgreindar reglur og staðla sé ekkert því til fyrirstöðu að samþykkis verði aflað eftir á, eða að gerðar verði breytingar á núverandi fyrirkomulagi innanhússlagnanna sem aðilar þessa máls yrðu ásáttir um. Sjá ákvörðunina í heild:Ákvörðun PFS nr. 26/2012 (PDF)